Një nga dosjet më voluminoze kundër një prej emrave më të përfolur të krimit në të dyja anët e kufirit që prej datës 12 nëntor, ka mbëritur në Ministrinë e Drejtësisë në Tiranë.
Bëhet fjalë për Klement Balilin. I shpallur në kërkim nga autoritetet greke shumë muaj më parë, ai vazhdon të jetë në kërkim, edhe nga ato shqiptare, të cilat shpesh ishin ankuar se ndaj Balilit nuk kishin prova të mjaftueshme për t’i nisur një proces gjyqësor.
Por tashmë në duart e tyre gjenden 10 mijë faqe përmbajnë fakte dhe dëshmi për trafik droge, njerëzish, por edhe vrasje, të cilat i mvishen Klement Balilit dhe grupit të tij të strukturuar kriminal, shkruan TCH.
Dosja është sjellë prej gati tre javësh e përkthyer në shqip. Arsyeja është pikërisht heqja e çdo lloj argumenti nga pala shqiptare, veçanërisht Ministria e Drejtësisë për vonesa në dërgimin e dosjes në Prokurorinë shqiptare.
Dërgimi i së njëjtës dosje në greqisht muaj më parë ende zvarritet në përkthim nga autoritetet shqiptare.
Burime zyrtare nga Ministria e Drejtësisë të kontaktuara nga ne, i pohuan Top Channel se dosja “Balili”, e përkthyer kësaj radhe në shqip nga vetë nga grekët, do t’i dorëzohet prokurorisë shqiptare paraditen e së mërkurës.
Nëse kjo ndodh, atëherë aventura gjyqësore e Klement Balilit, do të futet në një spirale të re, kësaj radhe me drejtësinë shqiptare.
