Kur kanë mbetur vetëm pak kohë përpara se Trump të marrë zyrën në Shtëpinë e Bardhë, ai ka deklaruar se do të anulojë marrëveshjen për blerjen e një modeli të ri avionësh nga kompania Boeing. Trump i kërkoi qeverisë të anulojë blerjen e një avioni të ri presidencial Boeing, duke thënë se kushtonte shumë shtrenjtë dhe ishte diçka “qesharake”.
“Boeing, është duke ndërtuar një avion të ri 747 për presidentët e ardhshëm, por shpenzimet janë jashtë kontrollit, më shumë se 4 miliardë dollarë. Të anulohet porosia!”, shkruan Trump në “Twitter”.
Forca Ajrore amerikane njoftoi janarin e kaluar se një avion i ri Boeing 747 seria 8 do të përdoret për të zëvendësuar dy avionët që përdoren tani për të transportuar presidentin. Avionët presidencialë të njohur me emrin “Air Force One” janë ndër simbolet më të njohura të Shteteve të Bashkuara jashtë vendit.
Hollësitë rreth çmimit të kontratës së re nuk janë bërë publike, por Forca Ajrore kishte njoftuar më parë se kishte planifikuar 1.65 miliard dollarë për zëvendësimin e dy avionëve.
Në rast se marrëveshja do të shkojë sipas parashikimit, avionët e rinj Air Force One mund të hynin në përdorim në vitin 2024, gjë që do të thotë se Trump mund të mos kishte shansin për të udhëtuar me një prej tyre, edhe në rast se do të fitojë një mandat të dytë për të drejtuar Shtetet e Bashkuara.
