Kreu i Kuvendit Ilir Meta deklaroi se nuk ka vendosur ai se kush do të qeverisë, por qytetarët shqiptarë dhe se ai ka qenë vetëm lexues i vullnetit të tyre.
Duke folur në emisionin “Të paekspozuarit”, Meta theksoi se LSI ka lindur si parti opozitare dhe Ilir Meta është larguar nga pozicioni i kryeministrit dhe ministrit të jashtëm.
“Unë mendoj si zoti Lubonja që ju e nisët jo thjesht në mënyrë tendencioze, por në një mënyrë pak edhe kështu gazetareske, edhe intriguese edhe pak abuzive. Nuk është e vërtetë që ka vendosur Ilir Meta kush do të qeverisë. Kanë qenë qytetarët shqiptarë dhe Ilir Meta është përpjekur të lexojë në mënyrën sa më korrekte vullnetin e tyre. Në 2009 kur nuk kishte asnjë zgjidhje tjetër për stabilitetin e vendit… LSI ka lindur si parti opozitare dhe Ilir Meta është larguar nga pozicioni i kryeministrit dhe ministrit të jashtëm. Në 2009 populli votoi PD-në dhe Ilir Meta kishte dy zgjidhje ose të bashkohej me PD dhe të bënte qeverinë për të siguruar stabilitetin e vendit ose të bënte koalicion me PS dhe të mos prodhonte asgjë”, tha Meta.
Kreu i LSI-së tha se ka një mosbesim nga grupet e interesit për ligjin e mbetjeve për shkak se ka pasur një cedim për sa i përket bashkëpunimit me ta.
“Duhet të ishte bërë një punë më përfshirëse. Ruajtja e mjedisit i kalon interesat e të gjithëve. Ligji është në përputhje me direktivat e BE-së, por nëse Shqipëria i ka kapacitetet kjo është diçka tjetër. LSI është e prirur për nga interesi i publikut. Kur të jetë momenti i duhur do t’i përgjigjemi edhe dekretit të Presidentit”, – tha Meta.
