NGA ANDI BUSHATI
Një propozim i disa deputetëve socialistë për shtyrjen e zbatimit të ligjit për lojërat e fatit pritet të shkaktojë sërish debate, njësoj si me ligjin për plehrat.
Disa deputetë kanë kërkuar që efektet e këtij ligji të mos nisin në fund të dhjetorit, por në vitin 2018. Kjo do të bënte që kazinotë të mos zhvendosen që tani nga qendrat e qyteteve, drejt hoteleve me 5 yjeve dhe resorteve turistike, por pas më shumë se një viti. Andi Bushati, shkruan sot në portalin lapsi.al se arsyet që përmendin deputetët e Partisë Socialiste në relacionin e projektligjit janë qesharake.
“Edi Rama atëhere nuk e fshihte triumfalizmin. Ai i paralajmëroi pronarët e lojrave të riskut që të bëheshin gati ta linin këtë punë se nuk mund të bënin para gjithë jetën me një biznes i cili po shkatërronte familjet dhe po ndikonte në ekuilibrin psiqik të njerëzve.
Po ti lexosh arsyet që ata (emrat e propozuesve gjenden në shkrimin poshtë) rendisin në relacionin dërguar kuvendit, ato janë qesharake. Ata i qajnë hallin pronarëve të kazionove që kanë nënshkruar kontrata marrjesh me qira më të gjata sesa dhjetori 2016. Ata pretendojnë se Shqipëria ka dështuar të ndërtojë rezorte turistike me 5 yje, kështu që lojrat e fatit nuk kanë se ku të zhvendosen.
Ata paralajmërojnë mbylljen e 1800 vendeve të punës dhe zhdukjen nga buxheti i shtetit të 125 milionë eurove në vit që derdhin këto kompani. Eshtë e kotë ti komentosh këto argumenta qesharakë”, shkruan Bushati.
Sipas tij “Pse vallë nuk e dinte rilindja tre vitë më parë se Shqipëria nuk do të shndërrohej kaq shpejt në një parajzë rezortesh me 5 yje? Pse vallë nuk e dinin ekonomistët e saj se sa njerëz punësonin këto biznese dhe sesa të ardhura derdhin ato në buxhet? Pra, asnjë nga arsyet që e bënë Ramën të shpallte në tetorin e 2013 “fundin e marrëzisë” nuk ka ndryshuar. Po atëhere, pyetja që shtrohet është: pse po ndodh ky mohim i plotë i asaj që u shpall me pompë tre vite më parë?
Arsyeja e vërtetë gjendet midis reshtave në të njëjtin relacion, që deputetët e komisionit të ekonomisë (me siguri që ata nuk bëjnë asgjë pa urdhër nga lart), i dërgojnë kuvendit. Aty kërkohet mbështetje për bizneset e lojrave të fatit si kontributorë të rregullt të buxhetit të shtetit. Aty lëshohet gjithashtu edhe kërcënimi se mos na bëjnë ndonjë gjëmë dhe i zhvendosin aktivitetet e tyre në tregjet e huaja. Pra, po të shihet me vëmendje është e njëjta logjikë si ajo që u përdor për rikthimin e importit të plehrave”.
“Në këtë rast përpara kujdesit për shëndetin e qytetarëve u vu interesi i lobistëve të mafies. Për kazinotë, përpara harmonisë së familjeve dhe ekuilibrit psiqik të qytetarëve, që poropgandonte dikur Rama, po vendoset interesi i atyre që ai dikur i etiketonte si bizese kriminale. Dhe nuk kishte si të ndodhte ndryshe. Me një qeverisje që premtoi pezullimet e ndërtimeve në Tiranë dhe që po e shndërron atë në një mostër betoni, që i shpalli luftë hashashit, por më pas la të mbillet gjithë vendi, nuk mund të shpresohej se do të dilte i humbur biznesi « kriminal » i kazinove”.
