Ministrja e Integrimit Klajda Gjosha deklaroi sot në një konferencë shtypi se ekziston një mundësi që në dhjetor, vendet anëtare të BE-së të kërkojnë një raport të ndërmjetëm nga Shqipëria për të parë zbatimin e Ligjit të Vetingut në kuadrin e procesit për hapjen e negociatave për anëtarësim.
Gjosha tha se data do të përcaktohet kur të zbatohet vettingu.
Ministrja e paralajmëroi një fakt të tillë me fjalët “nëse do të kërkohet, nëse do të arrihet një konkluzion i tillë në Këshillin e dhjetorit.”
Gjosha vlerësoi si “tejet pozitiv”, takimin e Kryeministrit Edi Rama me Kancelaren Angela Merkel. “Mund t’ju siguroj se kjo dëshmon mbështetjen e kancelares për Shqipërinë dhe gjithë shqiptarët dhe dëshiroj të falenderoj kancelaren Merkel për mbështetjen që ka dhënë në gjithë këto vite për reformat e ndërmarra nga Shqipëria.
Po kështu, pozitiv ishte fakti për të qënë në një mendje për një proces të parashikueshëm dhe pa surpriza për zbatimin e ligjit të Vetingut dhe 5 prioriteteve kyçe.
Kjo do të thotë se sa më shpejt të zbatohet ky ligj dhe të nisë zbatimi i tij, aq më shpejt do të nisin negociatat me BE.
Vë në dukje se as nuk duhet të mërzitemi dhe as të gëzohemi me deklaratat e deputetëve të ndryshem të grupeve parlamentare. Në dhjetor do të njihemi me vendimin final të vendeve anëtare.
Ky është një proces i brishtë dhe vendimi varet nga konjukturat e vendeve të ndryshme, po dihet që pesha e Gjermanisë nuk është e vogël.
Si ministre e Integrimit dua të sjell në vëmendje që procesi i integrimit i përket të gjithëve. Ajo që do të shpresonim është që vendet anëtare të mirëpresin vendimin e ardhur nga Komisioni Europian,”theksoi Gjosha.
