Polica e Elbasanit ka nisur hetimet për vrasjen e 18-vjeçarit Gazmend Sllami dy orë pasi kishte marrë një telefonatë dhe i riu doli nga banesa.
Ngjarja e rëndë ndodhi në fshatin Gur i Zi të Elbasanit, kur 18 vjeçari u gjet i vrarë me plumb në zemër 200 metra larg banesës së tij. Familjarët e viktimës kanë pohuar për policinë se nuk kanë pasur asnjë konflikt dhe se djali i tyre nuk ka pasur asnjë problem me persona të tjerë. Ata i pohuan grupit të hetimit dyshimin se vrasësi e ka telefonuar djalin e tyre para se të kryente krimin. “Djali nuk ka thënë në shtëpi se ku po shkonte, por menjëherë pas telefonatës, ai doli. Ne nuk është se dyshuam se kjo telefonatë ishte e fundit për djalin tonë. Ai nuk kishte asnjë problem dhe konflikt. Nuk na kishte thënë diçka të tillë. Pas telefonatës doli menjëherë, por nuk na tha se kush e telefonoi dhe pse do të dilte”, janë shprehur familjarët e 18-vjeçarit, të cilët janë marrë në pyetje nga policia për të mësuar nëse i riu i vrarë mund të ketë pasur konflikte, çka mund ta bënte më të lehtë identifikimin e autorit.
Blutë e Elbasanit bënë të ditur se janë duke hetuar thirrjet e fundit të të riut, gjë që mund të identifikojë autorin. Nuk ka ende të dhëna në lidhje me shkakun e mundshëm të vrasjes, ndërsa sipas grupit të hetimit, nuk përjashtohet asnjë pistë.
PISTA E KONFLIKTIT
Viktima Gazmend Sllami nuk ishte as bari dhe nuk kishte as ara që të shkonte në kodër. Ky fakt hedh dyshime se i riu ka dalë të takojë dy persona që i ka njohur, prandaj edhe dyshohet se autorët e krimit mund të jenë miq të tij, por jo nga fshati Guri i Zi, por nga fshatrat përreth tij. Blutë e Elbasanit po hetojnë në shumë pista, ku mes tyre nuk përjashtohet as një sherr mes adoleshentësh. Sakaq, policia ka nisur krehjen e zonës, pasi dyshon se autori ende fshihet mes maleve. Përveç familjarëve, në pyetje janë marrë fqinjë dhe shokë të 18-vjeçarit.
