Zëdhënësja e kryesisë së PS-së, Elisa Spiropali, sqaroi se pse e quajti “kamikaze” studenten Mirela Ruko, që i hodhi salcë në kokë ministres së Arsimit Lindita Nikolla.
E ftuar në emisionin “Të paekspozuar” në News24, Spiropali theksoi se e gjithë ngjarja ishte show. “Janë një lëvizje, një grup i vogël njerëzish që kanë mendimet e tyre. Janë pakicë shumë e vogël. E kam quajtur “kamikaze” ashtu simbolikisht se bëhet vetëm për të rënë në sy, për të krijuar show, me kë? Me një ministre krejt të pambrojtur që nuk lëviz me roje. Ishte në një shesh të hapur. Këta i kishin zënë pritë, edhe me Kanun nuk i zihet pritë një gruaje. Dhe për çfarë? Kërkesat e tyre janë janë primitive”,- sqaroi ajo.
Por i menjëhershëm ishte reagimi i studentes Ruko, pjesë e emisionit, në një studio të dytë, duke iu përgjigjur Spiropalit se nuk ishte koha e ‘Kanunit’. “Nuk ka qenë veprimi i parë. Kam bërë dhe veprime të tjera. Po i them Elisës se unë kam vepruar edhe më herët me ministres, kërkesa, peticione. Ka qenë një veprim i duhur, njollosje për gjithçka që ministrja ka bërë me reformën në arsimin e lartë. Fatmirësisht nuk jemi në kohën e Kanunit, pasi edhe Elisa nuk do ishte këtu të fliste lirshëm. Elisa ndoshta ka harruar që ka ngrënë bukë në shtëpi punëtorët. E ka harruar për të ardhur në pushtet. Unë sot bëj të drejtën time për të protestuar. Nëse ka padrejtësi kudo në botë, nuk i jepet askujt e drejta.”, tha studentja nga Fieri.
