Deputeti Ben Blushi dhe themeluesi i LIBRA-s, ka deklaruar nga foltorja e parlamentit se Shqipëria do të kthehet në një kazan plehrash. Sipas Blushit, të gjithë kazanët e plehrave të Italisë dhe Greqisë do të derdhen në Shqipëri.
Blushi ka treguar edhe një histori, ku kryebashkiaku i Korfuzit i ka kërkuar një politikani shqiptar që të miratohet ligji i plehrave pasi ata nuk kanë ku t’i çojnë dhe do i sjellin në Sarandë se u bie më lirë.
Blushi thotë se ndonëse janë përmbushur afatet, ky ligj nuk sillet për votim në Kuvend, për shkak të presionit popullor, duke u ndalur edhe tek protesta e shoqërisë civile para Parlamentit që prej mbrëmjes së djeshme.
“Pse dekreti nuk është në seancë? E dimë që do ta bëjnë pas kësaj dhe arsyeja është ti provokojmë pak sesi janë këta që sjellin mbetjet në Shqipëri. Kush është pro importit dhe kush është kundër: pra kush do të rrijë në kazan dhe kush nuk do të rrijë Pse nuk sillet ligji? Sepse nuk kemi vota sepse ka më shumë vota keqbërësish se vota të atyre që duan të votojnë pro. Dhe e dyta: Se ka një shkak që ka frikë nga presioni dhe kërkon ta modifikojë ligjin që bie në kundërshtim me procedurën parlamentare. Dekreti i presidentit e ka mbushur afatin e 8 javëve për t’u shqyrtuar nga ky parlament.Ja ç’po ndodh përreth nesh: Janë përgatitur të gjitha kazanët e Greqisë dhe Italisë për t’u derdhur në Shqipëri. Më thoshte një mik se kryetari i bashkisë i Korfuzit e pyeste kur do ta votoni atë ligjin se na mbetën plehrat. Se I bie më lirë t’i djegë në Sarandë dhe jo në Korfuz. Na thonë se BE na kërkon të djegim mbetjet”, tha Blushi.
Deputeti, themelues i LIBRA-s vuri alarmin edhe për uljen e moshës të shqiptarëve të prekur nga kanceri.
“Numri i shqiptarëve të prekur nga kanceri po ulet mosha. Për çfarë po rritet numri i prekjeve nga kjo sëmundje, e dini ju? Sigurisht që e dini, nga ndotjet në atmosferë, nga uji”, tha ai.
Blushi i ndal edhe tek projekti tjetër i qeverisë për dhënien me koncesion të laboratoreve. Ai tha se fatura në buxhet për koncesionet shkon në 8 mln euro në vitin 2017, ndërsa për universitetet janë vetëm 6 mld lekë.
“Po përgatiten të jepen me koncesion laboratorët. E di sa është fatura 8 mln euro në vit. A mund të jepen të gjithë laboratorët publikë me koncesion? Për çfarë? Ju që e keni kaluar në parim, se unë nuk do ta votoj. A e dini sa është fatura e koncesioneve për vitin 2017, 7.2 mld lekë të reja. E dini sa është fatura për universitetet publike që paguajmë nga xhepi, 6 mld. Pra, 7 mld për koncesionet që nga check up-deri tek laboratoret dhe 6 mld për universitetet e gjithë Shqipërisë. Pa dalë për absurditetet e tjera të buxhetit”, tha Blushi.
Ai ka sjellë në seancë edhe takimin me një pensionist ish-kooperativist, që i ka drejtuar një pyetje për tua përcjellë deputetëve të tjerë.
“Por kam vendosur që sa herë vij në seancë t’ju bëj nga një pyetje. Pyetje nga ato që më bëjnë. E dini çfarë më tha një burrë tek njësia 6 dje…Kishte punuar gjithë jetën në kooperativë. E di sa e kishte pensionin 5 100 lekë të reja. Më tha kur të shkosh në parlament pyeti ata specialistët e ekonomisë, sa më rritet mua pensioni me rritjen galoponte që po bën qeveria, 3 %. E sa është? Totalisht i papërfillshëm. E pyeta ça pune ke bërë gjithë jetën? Më tha unë quhem kazmatolog, thuaju atyre në parlament. I kam rënë kazmës gjithë jetën, kam tharë kënetat. A ka ndonjë kazmatolog këtu në parlament? Po ka, janë ata që do i vënë kazmën buxhetit javës tjetër. Dikush do të qëndrojë në kazan, dikush do të dalë. Ka ardhur koha t’i marrin përsëri shkumësat besoj”, tha Blushi.
