Aksidenti fatal që i morri jetën këngëtarit 22- vjeçar Ergi Dini dhe shokut të tij Kejdi Halili 21 vjeç mësohet se nuk ka pasur shkak shpejtësinë e madhe.
Fituesi i spektaklit të talenteve “X Factor Albania” Ergi Dini, mbrëmjen e djeshme, e hënë, rreth orës 21.20 po udhëtonte bashkë me shokun e tij në bulevardin “Bajram Curri”, pranë urës së “Bllokut” në qendër të Tiranës.
Në bazë të hetimeve të para mësohet se dy të rinjtë kanë qenë duke dalë nga zona e ish-Bllokut në unazë te ura përballë Tajvanit të hipur në motorin e tyre tip Yamaha.
Dyshohet se dy të rinjtë nuk kanë qenë duke lëvizur me shpejtësi të madhe, por sipas dëshmitarëve drejtuesi i motorit i dha gaz atij duke ngritur gomën e parë në ajër. Por ky ka rezultuar edhe momenti fatal, pasi Ergi dhe Kejdi kanë rënë mbrapsht, duike marrë dëmtime fatale në kokë. Mësohet se dy të rinjtë nuk kanë qenë me kaska mbrojtëse, dhe se pavarësisht dërgimit në spital kanë ndërruar jetë për shkak të plagëve të marra. Ergi Dini ishte këngëtar i talentuar dhe arriti të fitojë edicionin e tretë dhe të fundit të X-Factor Albania në sezonin 2014-2015. Ai ishte që vigjilje të nxjerrjes së një kënge të re.
