“Viktima e atentatit mafioz dje në Fier, Nelgert Pata ishte prej 21 gushtit të këtij viti në kërkim nga policia, pasi iu bë një atentat në Tiranë, dhe ai nuk u paraqit në polici, nuk dha dëshmi, nuk bashkëpunoi, nuk denoncoi” dhe atë nuk e gjetën dot forcat e rendit, por bandat po.
Ky ka qenë qëndrimi i Partisë Demokratike ditën e sotme, pas vrasjes së 34-vjeçarit Nelgert Pata dje në Fier. Kreu i Departamentit për Sigurinë në PD, Enkelejd Alibeaj tha sot se në kërkim, sipas një emërtimi burokratik, pasi viktima jo vetëm nuk kërkohej nga policia, por krerët e saj, të përfshirë në një histori kriminale me të paktën 4 të vrarë deri tani, ofronin mbrojtje ose lehtësi sipas rastit.
“Pra policia e shpall zyrtarisht në kërkim prej 3 muajsh dhe nuk e gjen personin edhe pse ai lëviz lirshëm në Tiranë e në qytetet kryesore të vendit, por e gjen banda dhe e ekzekuton. Ky është shteti i Edi Ramës”, tha Alibeaj.
Sipas tij, kjo është një dëshmi e freskët dhe dramatike se si krerët e policisë të përfshirë në trafiqe e të ndarë sipas bandave, nuk zbatojnë ligjin, por u shërbejnë interesave kriminale.
“Nuk ka rend e siguri me këtë qeveri, me këtë ministër të brendshëm. Qytetarët kanë nevojë për sundim të ligjit dhe jo të bandave”, u shpreh Alibeaj.
