Analisti Artur Zheji, ka komentuar qëndrimin e kryeministrin Edi Rama të cilin e pret një Janar i ftohtë me kristale ngrice dhe ethesh që do të vijnë nga Uashingtoni.
Sipas Zhejit, “tani Rama e ka kuptuar fare mirë gabimin që ka bërë dhe ndoshta e kanë informuar se cili do të jetë reagimi i stafit politik dhe diplomatik të Trump, në Janarin e ftohtë të fillimpushtetit të tij”, shkruan ai në portalin “360 gradë”.
“Washingtoni është i akullt në Janar dhe padyshim akullnaja stinore do të sjellë edhe në Tiranën e kryeministrit “pikë uji”, kristale ngrice dhe ethesh nën zero. Por Rama, nuk rri pa reaguar dhe kjo është sidoqoftë një meritë e tij. Shumë shpejt lobistë të mirëpaguar do të turren drejt ëashingtonit, duke u përpjekur që ta shkrijnë këtë akull, me letra, përbetime dhe shumë dollarë. Porse nga ana tjetër, kryeministri pritet të fillojë një fushatë populiste dhe të afrohet “gju më gju” me popullin e vet shqiptar, jo pak hatërmbetur me drejtimin e tij. Dhe ai e bëri “shpikjen e parë inteligjente”, që edhe u quajt Samiti i Parë i Diasporës, një goxha gjetje për hir të së vërtetës, një Samit realisht i nevojshëm dhe i vonuar, që ja vlen të përshëndetet, pamvarsisht se na u tha që ishte, thjesht një “ide brilante e Lindës” dhe jo e strategjistëve të tij”, shkruan Zheji.
