Komisioni Qendror i Zgjedhjeve del me deklaratë lidhur me zgjedhjet e pjesshme në Kolonjë, duke konfirmuar fitoren e kandidatit të majtë Ilia Stefo.
Zëdhënësja e KQZ, Drilona Hoxhaj tha se është përmbyllur procesi i numërimit të fletëve të votimit për zgjedhjet për kryetar të bashkisë Kolonjë, për 36 qendrat e votimit. Sipas rezultatit paraprak kandidati i propozuar nga koalicioni “Aleanca për Shqipërinë Europiane”, Ilia Stefo ka marrë 5136 vota (62.86%), ndërsa kandidati i propozuar nga koalicioni “Aleanca Popullore për Punë dhe Dinjitet”, Dritan Hajro ka marrë 3053 vota (37.14%). Rezultatet paraprake për çdo kuti të fletëve të numëruara u raportuan në kohë reale nga KZAZ në Qendrën e të Dhënave të KQZ-së, rezultate të cilat u shfaqen edhe në faqen zyrtare të internetit të KQZ-së. Në vijim bëri me dije se tabela përmbledhëse e rezultateve të zgjedhjeve të ZAZ nr. 73, Kolonjë, për zgjedhjen e kryetarit të Bashkisë Kolonjë, miratohet dhe shpallet me vendim nga KZAZ-ja nr. 73. Hoxhaj tha se KQZ është në pritje të marrjes në dorëzim nga KZAZ-ja 73, të çdo materiali zgjedhore, kuti votimi, kuti të materialeve zgjedhore, vulat, e të tjerë, të çdo dokumentacioni zgjedhor të administruar nga KZAZ-ja, veçanërisht Tabelën Përmbledhëse të Rezultatit të Zgjedhjeve në këtë bashki, si dhe tabelat origjinale të rezultateve të çdo Qendre Votimi. “Në zbatim të detyrimeve ligjore, pas përfundimit të afatit kohor të ankimit në KQZ të vendimit të KZAZ nr.73, e cila është jo me vonë së 5 ditë nga shpallja e vendimit për miratimin e tabelës përmbledhËse të Rezultatit të Zonës Zgjedhore Bashkia Kolonjë, KQZ në zbatim të nenit 2, pika 18, germa b, të Kodit Zgjedhor, shpall rezultatin përfundimtar të votimit për kandidatin për Kryetar të Bashkisë Kolonjë”, deklaroi zëdhënësja e KQZ.
