Kryeministri Edi Rama nuk ka dhënë asnjë koment për deklaratat e ish-deputetit socialist Koço Kokëdhima, në lidhje me një lëvizje të re që pritet të themelojë brenda Partisë Socialiste.
I pyetur nga gazetarët pas përfundimit të mbledhjes së Grupit Parlamentar, Rama nuk ka folur dhe është larguar nga selia e partisë, sic e shikoni edhe në videon më poshtë.
Mundësinë e krijimit të një lëvizje të re në gjirin e PS-së e la të hapur vetë Koço Kokëdhima, i ftuar në emisionin e Eni Vasilit “Studio e Hapur” në News 24. I pari nga qeveria që komentoi këto deklarata, ishte ministri i brendshëm Saimir Tahiri, për të cilin, shprehjet e Kokëdhimës ishin thjesht “llafe pazari”, shkruan Panorama.
Por i vetmi koment i Ramës ishte për zgjedhjet në Kolonjë: “Dua të falënderoj nga zemra të gjithë zgjedhësit dhe zgjedhëset e Bashkisë së Kolonjës.
Na dhanë një besim të madh që është edhe një detyrim shumë i madh, sepse, natyrisht është e rëndësishme të fitosh, por, mbi të gjitha, është shumë e rëndësishme që të kuptosh se kur fitorja ka përmasa të tilla, bëhet një borxh i konsiderueshëm, të cilin ne do bëjmë çmos që t’ua shlyejmë qytetarëve e qytetareve të Kolonjës me edhe më shumë reforma, edhe më shumë, edhe më shumë përkushtim ndaj tyre dhe padyshim, edhe më shumë vëmendje, investime dhe bashkëpunim për ta çuar më tutje punën e nisur për Rilindjes e Kolonjës. Unë vlerësoj që zgjedhjet e djeshme ishin një tjetër mesazh shumë i qartë, shumë i fortë, lehtësisht i kuptueshëm për të gjithë. Pavarësisht se nuk kam shpresë, uroj që opozita, përkatësisht Partia Demokratike ta lexojnë këtë mesazh si një detyrim për të reflektuar lidhur me rolin që opozita duhet të ketë, sepse ka 3 vjet e kusur që e ka lënë bosh vendin e opozitës dhe e ka lënë Shqipërinë pa opozitë”, tha Rama.
