Duket se afera e ministrit të Shëndetësisë me pushimin nga telefoni të një vartësi dhe urimi i tij, suksese në jetë ka shkaktuar jo pak probleme brenda PS. Selia rozë duket se po vlon nga brenda, me disa klane të formuara por ndërkohë që edhe zullumet e ministrave po sjellin pakënaqësi dhe xhelozi mes socialistëve.
Deputeti i PS-së, Parid Cara ka reaguar për skandalin e Beqajt dhe kërkon shkarkimin e tij, pasi sipas tij, kostot që mund të sjellë tek zgjedhësit nuk duhet të bien mbi partinë.
Cara e quan të papërgjegjshëm minitsrin Beqaj dhe thotë se në kundërshtim me të gjitha procedurat ligjore, e konsideron pozicionin që i ka besuar kryeministri, si pronë të cilën mund ta përdorë si të dojë dhe jo si një post që mund të drejtohet vetëm brenda kornizës së parashikuar nga ligji.
Reagimi i Carës në Facebook
Një video e transmetuar pak ditë më parë ku ministri i Shëndetësisë, Ilir Beqaj është përgjuar teksa shkarkon me telefon një drejtor, ka ngjallur me shumë të drejtë reagim negativ në opinionin publik.
Ministri, në kundërshtim me të gjitha procedurat ligjore, e konsideron pozicionin që i ka besuar kryeministri, si pronë të cilën mund ta përdorë si të dojë dhe jo si një post që mund të drejtohet vetëm brenda kornizës së parashikuar nga ligji.
Një politikan i përgjegjshëm, pas asaj telefonate të transmetuar në emisionin “Stop” duhet të jepte dorëheqjen menjëherë. Kjo qeveri dhe kjo maxhorancë nuk mund të mbajnë kosto që nuk lidhen drejtpërdrejtë me punën e saj, por me tekat dhe arrogancën e një ministri.
Ilir Beqja duhet të japë dorëheqjen dhe të largohet, pasi çdo ditë më shumë ai në pozicionin e ministrit është kosto e panevojshme për Qeverinë në sytë e opinionit publik.
