Kritikat e kreut demokrat Lulzim Basha dhe Ben Blushit për Samitin e Diasporës duket se e kanë mërzitur kryeministrin Edi Rama. Pasi Ben Blushi e quajti të dështuar këtë samit për shkak se nuk garantoi votën e shqiptarëve që jetojnë nëpër botë, Rama i është kundërpërgjigjur në mbylljen e këtij Samiti.
Duke zgjedhur vargjet e 110 vjetëve më parë të Faik Konicës, Rama tha se tingëllojnë shumë aktuale.
“U shfaqën si punëprishës dhe çnuk thanë për organizimin e këtij Samiti, – tha Rama pa përmendur konkretisht emrin e Bashës dhe Blushit, duke vijuar më tej me citimin e Konicës:
“Ca kafshë, armiq të amëshuar të çdo përparimi të cilët e marrin kufirin e mendjes së tyre për kufirin e botës, nuk e kanë pëlqyer kurrë këtë qëllim tonë. Vërtet, është më e lehtë të pijë rakie njeriu, të pështyjë të shara, se të përpiqet të kuptojë. Po këtu kuptimi s’është i vështirë. A ka punë më të kulluar e më të kuptueshme se kjo?”
Është e lehtë përgjigja e kësaj pyetje – tha Rama – Ky Samit i përgjigjet më së miri: Punë më të kulluar nuk ka”.
