Ditën e sotme të rinj, banorë të Fierit dhe fshatit Mbrostar kanë bllokuar aksin rrugor Tiranë-Fier në shenjë proteste kundër ndërtimit të impiantit të mbetjeve.
Kjo nuk është protesta e vetme, është dita e gjashtë që banorët e Mbrostarit, vijojnë protestën. Banorët kanë deklaruar se rruga e Mbrostarit nuk hapet sot pa u liruar protestuesi Zylyftar Delibashi, i cili është ndaluar nga policia për pjesëmarrje në tubim të paligjshëm.
Blutë bëjnë me dije se kanë ndaluar shtetasin Zylyftar Delibashi, 65 vjeç, banues në fshatin Vajkan, Fier.
Gjithashtu u bë shpallja në kërkim policor e shtetasit F.M, 31 vjeç, banues në Mbrostar Ura si dhe u referuan materialet Prokurorisë së Rethit Gjyqësor Fier për shtetasin E.D, 28 vjeç, banues në fshatin Vajkan.
Të tre këta shtetas akuzohen për pjesmarrje nhë tubim të paligjshëm.
“Në vendin e quajtur “Mbrostar Ura”, në mënyrë të përsëritur të tre këta shtetas kanë marrë pjesë në tubim të paligjshëm dhe kanë qenë aktiv në bllokimin e rrugës nacionale Fier-Lushnje” thuhet në njoftimin e policisë.
Të zhgënjyer dhe nga mosrealizimi i takimit me kryebashkiakun Armando Subashi në bashkinë Fier pasditen e djeshme banorët kanë bllokuar herë pas herë segmentin rrugor Fier – Lushnje.
Nga kjo është bllokuar dhe qarkullimi i automjeteve duke shkaktuar dhe trafik të rënduar. Prezent kanë qënë edhe forca të policisë.
Banorët e Mbrostarit shprehen të vendosur për të mos lejuar ndërtimin e impiantit të djegies së plehrave pavarësisht vendimit të bashkisë.
