Një nga mbrojtësit e mëdhenj të Milanit në të kaluarën, Alessandro Nesta, beson se klubi po përfiton nga vënia e theksit te të rinjtë për të dalë nga hija e Juventusit.
Milani po udhëhiqet nga një “adoleshent”, Gianluigi Donnarumma, i cili shihet si trashëgimtar i Gianluigi Buffon në kombëtaren italiane; mesfushori 18-vjeçar, Manuel Locatelli, i ndjekur nga Chelsea, apo Alessio Romagnoli.
Dhe Nesta, që ka qenë një shtyllë e prapavijës së dy herë fituesve të Champions-it, pjesë e Milanit të drejtuar nga Carlo Ancelotti, është i kënaqur me atë që është duke parë në “San Siro”.
“Kuqezinjtë e filluan shumë mirë këtë sezon. Ata kanë ndryshuar trajnerin përsëri, por janë duke e bërë shumë mire detyrën.
Ndryshe nga vitet e fundit, kur skuadra u formua me lojtarë më të vjetër, tani Milani është shumë i ri.”
Milani do të ketë mundësinë për të çimentuar më tej vendin në Seria A, mes tre të parëve, me një fitore të mundshme mbi rivalët e qytetit, Interin, në derbin e Madonninës, të dielën.
40-vjeçari është i bindur se Milani do ta fitojë ndeshjen e nëntë të sezonit: “Presioni është i madh mbi skuadrat në Itali. Por, shpesh drejtuesit shkarkojnë trajnerët për të fshehur gabimet e bordit. Kjo nuk duhet të ndodhë, ky është mendimi im.”
