Polici i “fortë” i Erion Veliajt u plagos me thikë mbrëmjen e djeshme nga një i moshuar në oborrin e Policisë Bashkiake të Tiranës. Dritan Hardhia është polici që goditi një protestuese që ishte kundër ndërtimit të parkut tek Liqeni Artificial i Tiranës disa muaj më parë.
Sipas policisë autor i kësaj ngjarje është një 54-vjeçar i cili ka përfunduar në pranga.
“Rreth orës 21:00, është vënë në pranga në flagrancë Bujar Shehu, 54 vjeç, banues në Tiranë, sepse në orën 14:30, në oborrin e Policisë Bashkiake, ka tentuar të vrasë me thikë, punonjësin e Policisë Bashkiake Dritan Hardhia, 37 vjeç”, thanë për SYRI.net burimet nga policia e kryeqytetit.
Hardhia mësohet se ka pësuar disa plagë dhe është i shtruar në spital. Pas arrestimit të Shehut, burimet policore thanë se kanë sekuestruar si provë një thikë me mbishkrimin “Lord Stainless”.
