Ministri i Shëndetësisë, Ilir Beqaj u përgjua dy javë më parë në një bisedë telefonike teksa i kërkonte llogari drejtorit të Fondit të Sigurimit Shëndetësor, Clirim Hajdarmataj se përse nuk kishte marrë pjesë në një mbledhje të Asamblesë së PS¬së në Tropojë. Pas kësaj telefonete, Hajdarmataj thotë se është shkarkuar nga detyra. Përgjimi i publikuar mbrëmë në emisionin “Stop” në Tv Klan është komentuar në mënyra të ndryshme edhe nga analistët.
Blendi Fevziu: që në fillim e deri në fund, përgjimi dhe rasti është një shkelje e rregullave të funksionimit të administratës publike; një përdorim politik i saj dhe mbi të gjitha, një njësim i shtetit me partinë. Edhe pse këto gjëra kanë ndodhur rëndom në Shqipëri, pas aprovimit me konsensus të një ligji në 2013 besohej që kjo gjë, në mos do të mbaronte së paku do të kufizohej në maksimum. Për fat të keq kjo nuk ka ndodhur. Veta Hajdarmataj ka ardhur në krye të asaj drejtorie, siç e dëshmon edhe vetë në telefonatë falë angazhimit partiak. Ai ka zënë po me shkelje ligji vendin e dikujt tjetër. 3 vjet më pas, ai është edhe vetë viktimë. Për një vend pune, vetëm për një vend, ligji është shkelur 2 herë. Një herë kur u emërua Hajdarmataj si mbështetës i PS dhe një herë kur u shkarkua për mungesë në mbledhjen e Asamblesë. Apo edhe për ndonjë pakënaqësi tjetër partiake. Imagjino sa raste të ngjashme duhet të ketë në gjithë administratën shtetërore dhe imagjino se si duhet të jetë kthyer ajo sot në një bastion militantësh. Militantësh që për të mbajtur vendin e tyre të punës, nuk duhet t’i shërbejnë qytetarëve, nga taksat e të cilëve paguhen, por partisë që i emëron! Rasti dëshmon jo vetëm atë që e besojnë dhe e denoncojnë të gjithë; pra si bëhesh pjesë e administratës dhe si bën karrierë në Shqipëri; por edhe diçka tjetër. Që ligji në këtë vend nuk ka asnjë vlerë dhe se ligjin në këtë vend e bëjnë dhe e shkelin vetë partitë.
Artur Zheji: …dhe kështu vijmë te emisioni Stop, që ka shtënë në dorë materialin “sekret”, të cilin material rregjistrimi, dukshëm socialisti Çlirim, e ka mbajtur peng, për të zbutur apo për të bërë një pazar të ri, me shefin e vet të ashpër. Kuptohet që “Pazari’ nuk ka ecur dhe ministri socialist Beqja, ka ndejtur i qëndrueshëm në pozicionet e veta dhe si pasojë ka ardhur ndëshkimi publik, përmes publikimit të bisedës. Në këtë rregjistrim, nuk flitet për shëndetësi dhe as për shpëtim jetësh dhe as për korrupsion në mjekësi. Beqja nuk është dorëzuar presionit, ndonëse pabesia socialiste e ka ndëshkuar atë, sepse unë mendoj që rregjistrimi apo spiunimi, është një hakmarrje edhe më e ulët se sa pushimi i padrejtë apo i turpshëm nga puna. Gjithësesi, këto lajme që vijnë nga PS, rrëfejnë një parti në krizë dhe një egërsi të skajshme në pasionin për ngrënie kokash.
Mero Baze: Ministri ka dy vjet që është në syrin e ciklonit, duke e akuzuar për koncesionin e Check¬up, dhe për gjithfarë gjërash që ndodhin në spitale, që nga ata që nuk gjen dot doktorin, deri tek ata që nuk gjejnë dot ilaçet. Por inflacioni i akuzave ndaj një ministri, kam frikë se është në favor të tij, kur tentohet të përdoret çdo banalitet kundër tij. Ky rasti i drejtorit tropojan, përveçse nuk më duket skandal fare, që është pushuar, më duket dhe shumë i neveritshëm kur mendoj, se si është emëruar ai tip drejtor. Ai është emëruar aty politikisht, siç bëhen emërimet e gjithë drejtorëve të rëndësishëm në sistem, dhe këtu debati duhet bërë, si të zgjidhim çështjen e sistemit të drejtorëve politikë, dhe jo t’i qajmë hallin kur ata ndërrohen me njëri-tjetrin.
