Pas audio -skandalit të publikuar ditën e djeshme ku Ministri i Shëndetësisë Beqaj shkarkonte nëpërmjet telefonit ish -drejtorin e degës së Fondit të Sigurimeve të Kujdesit Shëndetësor në qytetin e Tropojës, vetëm se nuk morri pjesë në mbledhjen e partisë, një tjetër Ministër emëron e shkarkon me udhëra politikë.
Një dokument i zbuluar nga Lapsi.al hedh dritë mbi masakrën e bërë në administratën shtetërore me emërimet dhe shkarkimet.
Dokumenti tregon se si në Drejtorinë e Përgjithshme të Tatimeve një numër inspektorësh janë emëruar në detyrë me udhër të Ministrit të Bredshëm Saimir Tahiri. Një numër tjetër në njësinë e hetimit të Tatimeve apo në Drejtorinë Rajonale të Tiranës është bërë me udhër të Njësisë Nr. 3 të Partisë Socialiste.
Me udhër të Ministrit të Brendshëm, Saimir Tahiri, është punësuar më 25 shkurt 2014 Elsid Xhelili, me detyrë inspektor. Në të njëjtën ditë janë emëruar inspektorë Fatjon Bojari e Neritan Matoshi.
Më 4 qershor 2014 është emëruar Evis Balla, inspektore ndërsa më 16 janar 2014 është emëruar inspektore Yllka Sakaj.
24 emërime të tjera janë bërë nga viti 2014 deri në vitin 2016 në Tatime nga Njësia Nr.3 e Partisë Socialiste.
Po me udhër të Saimir Tahirit, më 25 shkurt 2014, është larguar nga detyra inspektorja Amanda Kroj, e cila gëzonte edhe statusin e Nëpunësit Civil.
Me kërkesë të Partisë Socialiste, dega e Njësisë 3 janë bërë 4 largime të tjera nga puna.
Një vit më parë Lapsi.al zbuloi një tjetër listë për rekrutime partiake në administratën tatimore.
Ishin plot 372 vetë të punësuar me ndërhyrjen e deputetëve të ndryshëm socialistë. Numrin më të madh të rekomandimeve e kishte Taulant Balla, me 80 të tillë.
Lista e sotme e zbuluar nga Lapsi.al është një tjetër provë se si vazhdon të mbushet administrata me militant partiakë.
