Deputeti Ben Blushi ka akuzuar qeverinë për ligjin e dosjeve që ka dërguar për votim në Parlament. Gjatë fjalës në seancën e sotme, Blushi thotë se me hapjen e dosjeve po bëhet fushatë dhe po përdoret për zgjedhjet parlamentare të 2017-ës.
Blushi nuk beson se qytetarët do të jenë në gjendje për të gjetur dosjet, pasi shteti nuk është i interesuar ta bëjë këtë gjë. Deputeti e ka ilustruar këtë përmes një shembulli personal, që nuk mundi do të merrte një dokument vetëm sepse sipas tij nuk është rilindas.
“Ky shtet ka një raport shumë të keq me dokumentet publikë. Do të ishte një torturë për këdo që do të kërkonte dosjen e vet. Ky është modeli sesi trajtohen njerëzit. Një person që është votuar nga kjo mazhorancë, Avokatja e shtetit, para një muaj iu drejtova kësaj zonje për të marrë një dokument. Iu drejtova Avokates së Shtetit dhe nuk më ka dhënë përgjigje. Imagjinoni një njeri të thjeshtë që shkon për të marrë një dokument publik nga këta që janë votuar për të qenë arrogant. Sot e gjithë ditën kjo avokate nuk më ka dhënë mua një letër që e ka firmosur vetë dhe nuk ma jep. Nuk ma jep se nuk jam rilindas”, u shpreh Ben Blushi.
Në fund të fjalës së tij, deputeti akuzoi të dyja palët politike se asnjëra prej tyre nuk është e interesuar që të hapen dosjet e komunizmit. Sipas Blushit, e vetmja mënyrë që ky vend të reformohet është hapja e dosjeve.
Jo vetëm që ne nuk do të hapim dosjet dhe procesi do jetë selektiv dhe i politizuar. Votojeni këtë, por prapë po e bëni për zgjedhjet. Ka vetëm një mundësi që ky vend të reformohet. Të hapen dosjet”, theksoi Ben Blushi.
“Ky autoritet që votoni ju politikisht ju, do të bëjë hapje transparente dhe të arsyeshme të dosjeve. Nuk e besoj”, tha Blushi.
