Avokati i Popullit, Igli Totozani ishte pjesë e një seminari të mbajtur ditën e sotme me temë “Mbrojtja e azilkërkuesve dhe refugjatëve në Shqipëri”, organizuar nga UNHCR dhe Këshilli i Evropës.
Duke folur në këtë seminar ai është shprehur se gjatë këtij viti në vendin tonë kanë hyrë 677 migrantë, nga të cilët vetëm 85 persona kanë kërkuar mbrojtje.
“Rreth 677 migrantë kanë hyrë në territorin e Shqipërisë përgjatë vitit 2016. Nga këta vetëm 85 persona kanë kërkuar mbrojtje nga shteti shqiptar, e cila i është pranuar. Pjesa tjetër kanë kërkuar të kthehen në vendet e tranzitit nga kanë ardhur (kryesisht nga Greqia) për të vijuar më tej rrugëtimin e shpresës, për të arritur në vendet e destinacionit.”, tha Totozani.
Ai nuk ka nguruar pa kritikuar shtetin shqiptar, pasi sipas Totozanit shume presona të cilët erdhën në Shqipëri u vendosën në një kamp dhe për 10 ditë ju privua lira.
“Ndonëse në përmasa minore, edhe në Shqipëri u ndeshëm me raste të shkeljes së të drejtave të njeriut, ku për rreth 10 ditë, shumë persona u vendosën në gjendje privimi nga liria në qendrën e mbyllur të Kareqit. Kjo gjendje duhet të marrë fund dhe tanimë është momenti që të flasim për integrimin e refugjatëve në shtetet tona, duke u garantuar të drejta sikundër edhe për shtetasit e tjerë. Duhet t’u garantohet akses në arsim, në shëndetësi, punësim etj.”, përfundoi Totozani.
