Hetimi penal i nisur nga Prokuroria e Tiranës, për të paktën 500 dosje pensionesh me përfitues në kryeqytet, ka sjellë nisjen e verifikimit administrativ për 1500 dosje në rrethe. Madje është ngritur një TaskForcë për të verifikuar të njëjtin fenomen edhe në rrethe.
Bëhet me dije nga burimet e gazetës Panorama se nga kontrolli paraprak i kryer prej TaskForcës së ngritur janë veçuar 1500 dosje të klasifikuara si “të dyshimta”.
Mësohet se sektori i Auditit ka njoftuar Prokurorinë se do të depozitojë kallëzim penal, duke kërkuar nisjen e hetimeve edhe për këto 1500 raste që mësohet se ka përfitues pensioni qytetarë në rrethe të ndryshme të vendit, jashtë Tiranës.
Disa javë më parë, sektori i Auditit në drejtorinë e Institutit të Sigurimeve Shoqërore të Tiranës ka përcjellë kallëzimin penal për mashtrime e falsifikime në të paktën 500 dosje pensionesh në kryeqytet. Për këtë rast, Prokuroria e Tiranës ka vendosur nisjen e hetimeve, me dyshimet se janë vjedhur padrejtësisht nga buxheti i shtetit dhjetëra milionë lekë, përmes dhënies së pensioneve për persona që nuk u takon.
Një mënyrë tjetër abuzimi, sipas Prokurorisë, ka qenë edhe përfitimi i pensioneve të veçanta në vlerë të madhe, si “pension minatori”. Bëhet fjalë për falsifikime masive në dosjet e pensioneve nga viti 2000 e në vazhdim.
HETIMI PËR PENSIONET
Njësia Task¬Forcë në Prokurorinë e Tiranës ka vendosur regjistrimin e procedimit penal për akuzat e falsifikimit të dokumenteve dhe “vjedhjes me anë të mashtrimit”, pasi kallëzimit për 500 dosjet e para të dyshuara të pensioneve në Tiranë. Nga ana tjetër, pas regjistrimit të këtij procedimi, Prokuroria ka sekuestruar qindra materiale shkresore në dosjet e dyshuara tek Instituti i Sigurimeve Shoqërore. Sekuestrimi i dosjeve është bërë për t’i verifikuar rast pas rasti, duke kontrolluar rregullsinë e çdo dokumenti që është futur në to. Për këtë arsye, Prokuroria ka thirrur për t’i pyetur qytetarët përfitues të pensioneve, ndërsa po eksperton edhe dokumentet që ata kanë paraqitur për përfitimin e pensioneve.
FALSIFIKIMET
Në shumicën e rasteve, sipas Prokurorisë, në dosje janë gjetur certifikata false, vërtetimet për vitet e punës (vjetërsinë) etj. Për këtë arsye, dosjet janë sekuestruar dhe verifikuar rast pas rasti. Hapi i radhës pas sekuestrimit të shkresave ka qenë ekspertimi i tyre, me qëllim provueshmërinë e veprës penale të falsifikimit që ka sjellë për pasojë marrjen e parave nga buxheti i shtetit në mënyrë të padrejtë.
PENSIONET E PADREJTA
Sipas Prokurorisë, deri tani janë evidentuar raste personash që marrin dy pensione të ndryshme, edhe pse janë i njëjti individ. Po kështu janë evidentuar raste të tjera të marrjes së pensionit, duke u paraqitur si “nënë me shumë fëmijë”, me qëllim përfitimin e një vlere sa më të madhe të pensionit. Për të gjitha këto raste janë paraqitur vërtetime apo dokumente të falsifikuara tërësisht, ose pjesërisht, në përbërjen e tyre. Për këtë arsye, Prokuroria ka nisur proceset e ekspertimit të këtyre shkresave për të faktuar edhe krimin e mashtrimit e të falsifikimit.
