Humbja e Shqipërisë me një rezultat të thellë 0-3 ndaj Izraelit, nuk po kapërdihet dot nga shqiptarët dhe madje as vetë sportistët e Kombëtares që vijojnë ende të analizojnë situatën.
Mërgim Mavraj fajëson për humbjen dhe ‘boshllëkun’ në stadium panikun e përhapur nga kundërshtarët, Izraeli, që sipas tij futën përçarje e frikë tek tifozët.
Mavraj shtron pyetjen: A duhet thënë STOP? A duhet të abuzojnë të tjerët me mikpritjen shqiptare?
“Sa e sa marrëzi, sa e sa poshtërsi janë bërë në dëm të së gjorës Shqipëri! Por a duhet thënë STOP? A duhet të abuzojnë të tjerët me mikpritjen tonë?
Një vend nuk e bën të madh numri i banorëve, por karakteri, zemra, dëshira e krenaria e atij popullit!
Ne kemi tradita, e këtë e tregon qartë historia e kombit tonë! Ne nuk duhet t’i hedhim asnjëherë poshtë njerëzit tanë, tifozët tanë, gjakun tonë vetëm se “siguria” e tjetrit është në “rrezik”!
A kishte rrezik më të madhe ndaj nesh në Serbi?! A kishte poshtërim më të madh se përçarja e frika që futën tek tifozët tanë dy ditë më parë kundërshtarët?! Nuk besoj se ka ndonjë qe mendon se shkaktar i atij “boshllëku” që u krijua në stadium ishte shiu, por paniku i hapur kot së koti.
Futbolli duhet të japë mesazh paqeje, e jo të krijojë panik, stres e përçarje. Unë nuk e ndjej veten aspak mirë kur krijohen situata të tilla! Tifozët tanë e duan këtë vend, e duan këtë kombëtare e ndaj duhet ta shijojnë siç duhet, të paktën në shtëpinë e tyre! Tjerët, le ta “gjejnë” të keqen diku tjetër, jo tek Shqiptarët!”, shkruan maraj në faqen e tij në Facebook.
