Dy policë janë fotografuar brenda një hoteli në qendër të Tiranës, por kanë harruar një detaj që u prish shumë punë.
Ndoshta ata kanë mbaruar shërbimin e tyre dhe janë ulur për të pushuar paksa, pasi janë fotografuar në të njëjtin hotel ku kanë qëndruar izraelitët në pritje të ndeshjes së sotme. Kujtojmë se shteti bëri “namin” me masat e marra për sigurinë e futbollistëve izraelitë, pasi teksa lojtarët mbërritën në Shqipëri, u bllokua plotësisht rruga ku ata do kalonin.
Gjithashtu, një tjetër masë ishte fakti që ata kanë ardhur me furgonë mallrash dhe jo me autobus, siç ndodh gjithnjë për lojtarët e një skuadre.
Masa tjetër ekstreme është që ata as nuk kanë zbritur në hollin e hotelit, madje janë stërvitur në katin e 23-të të hotelit. Por, të gjitha këto masa hidhen poshtë kur shikon këtë foto të polices bionde dhe kolegut të saj. Siç duket në fotot e mëposhtme, ata janë ulur në kolltuqe teksa merren me celularët e tyre, raporton JOQ.
Duket se vëmendja e tyre është e përqëndruar e tëra tek celularët, ndërsa në divanin përballë shihet një automatik. Një veprim krejt i papjekur nga ana e policëve, të cilët mesa duket nuk e dinë rëndësinë e armëve që u është besuar, por e kanë lënë atë mbi divan si të ishte një automatik lodër.
