Duhet të ishte një ditë feste në familjen Ndoj në fshatin Plani i Bardhë në Klos, por ajo është kthyer në një tragjedi për familjen.
Vdekja e 44 vjeçarit Xhevahir Ndoji i cili dyshohet se u rrëmbye nga rrjedha e lumit dhe trupi i tij nuk është gjetur ende ka bërë që të hapen dyert e mortit. Dhjetëra banorë të zonës, të afërm dhe qytetarë të tjerë kanë udhëtuar drejt fshatit të largët ku humbi jetën tragjikisht 44-vjeçari.
Ngjarja ndodhi një ditë para fejesës së vajzës së tij. Të afërmit thonë se Xhevahiri udhëtoi atë mëngjes drejt një HEC-i për të dërguar në punë dhëndrin. Vjehrri i viktimës, Murat Bardhi thotë se tani i janë shtuar hallet pas humbjes së dhëndrit dhe se duhet të kujdeset për katër mbesat e mbetura jetime dhe vajzën e mbetur të ve. Ai apelon për ndihmën nga strukturat shtetërore të shtojnë forcat për gjetjen e trupit të pajetë të dhëndrit. Bardhi falënderon Policinë dhe banorët e Klosit që vazhdojnë përpjekjet për gjetjen e trupit të viktimës.
