Këshilli i Lartë i Drejtësisë në mbledhjen e djeshme hapi “garën” për pesë vende gjyqtarësh në Gjykatën e Shkallës së Parë Tiranë, si dhe për kreun e kësaj Gjykate.
Të gjithë kandidatët mund të paraqesin kërkesat për vendet vakante deri më datë 15 nëntor. “Afati për të paraqitur kërkesë për në këtë vend vakant është deri më datë 15.11.2016”, thuhej në njoftimin zyrtar të KLD¬së pas përfundimit të mbledhjes.
Kjo vjen një ditë pasi Presidenti i Republikës dekretoi emërimin në Apel të gjyqtarëve që ushtronin funksionin në Shkallën e Parë, kur KLD miratoi kërkesën e ministrit të Drejtësisë për të shpallur vakante vendet e tyre. Kërkesa u miratua nga anëtarët e pranishëm në një mbledhje që ka zgjatur vetëm 45 minuta.
Njëkohësisht, KLD delegoi gjyqtaren Enkelejdi Hajro për të ushtruar përkohësisht detyrën e kryetarit të Gjykatës së Tiranës dhe shpalli vakant pozicionin e drejtuesit të institucionit. Edhe për këtë vakancë, KLD ka përcaktuar afat për paraqitjen e kandidatëve deri më 15 nëntor.
Ky vendim vjen pasi ish¬kryetari i kësaj Gjykate, Fatri Islamaj, ishte një nga pesë gjyqtarët e emëruar në Apelin e Tiranës. Në vijim të mbledhjes së djeshme, KLD ka shpallur vakant një vend pranë Inspektoratit të këtij Këshilli, i mbetur i lirë pas emërimit të Vojsava Osmanajt në Apelin e Shkodrës. Dy ditë më parë, më 8 nëntor 2016, Presidenti i Republikës Bujar Nishani firmosi pesë propozimet e paraqitura nga KLD pas mbledhjes së 4 nëntorit për emërimin në Apelin e Tiranës të pesë gjyqtarëve dhe të gjyqtares Osmanaj në Apelin e Shkodrës.
Në atë mbledhje, KLD propozoi për emërim në Apelin e kryeqytetit gjyqtarët Elona Stavri, Elbana Lluri, Fatri Islamaj, Asim Vokshi dhe Artur Gaxha. Në momentin e propozimit, ata ushtronin funksionin në Shkallën e Parë Tiranë, ku gjyqtari Islamaj ishte edhe drejtues. Kandidatët u votuan pasi anëtarët e KLD¬së u këshilluan me procesverbalin e testimit, raportin mbi rezultatet e pikëzimit të kandidatëve, tabelat e pikëzimit dhe raportet mbi shqyrtimin e tyre. Në mbledhjen e parafundit, KLD transferoi në Apelin e Tiranës gjyqtarin Andi Civici, i cili ushtronte detyrën e gjyqtarit në Apelin e Vlorës.
