Ish deputeti socialist Koço Kokëdhima ka sulmuar sërish ish mikun e tij, kryeministrin Edi Rama nëpërmjet një statusi në facebook. Duke bërë një urim për fitoren e Donald Trump, Kokëdhima u shpreh se disa zyrtarë në Tiranë kanë bërë deklarata të papërgjegjshme për presidentin e ri amerikan.
“Kam shumë besim që, marrëdhëniet e Shqipërisë me Amerikën e z.Trump do të jenë shumë të mira, pavarësisht komenteve të papërgjegjëshme të disa zyrtarëve të Tiranës kundër tij.” – shprehet Kokëdhima.
Biznesmeni shqiptar nuk ka ngurruar të cilësojë Shqipërinë si një vend pseudo-demokratik dhe me një sistem politik të kalbur. Ndërkohë Kokëdhima i është vërsulur edhe ministrave të qeverisë duke thënë se aty ka njerëz të papërshtatshëm dhe që populli nuk i ka votuar.
“Partitë politike në Shqipëri duhet të nxjerrin mësime nga ky mesazh. Mjaft më duke mbushur parlamentin dhe qeveritë me njerëz që populli nuk i do dhe nuk i voton. Mjaft më me sistemin e kompromentuar të numërimit të votave.”- shtoi më tej ish deputeti socialist në qarkun e Vlorës.
Nga Boldnews.al
