Kreu i Partisë Demokratike Lulzim Basha i është përgjigjur gazetarëve lidhur me hapjen e negociatave me BE-në. Në përfundim të mbledhjes së grupit parlamentar të PD-së, Basha tha se nuk është e vërtetë që opozita të ketë bërë thirrje kundër hapjes se negociatave, por thjesht ka qenë në të njëjtën linjë me kërkesat e BE-së. Më poshtë biseda me gazetarët.
Z.Basha, janë amendamentet e Partisë Demokratike një thirrje kundër hapjes së negociatave nga Bashkimi Europian?
Basha: Jo.
Z.Basha përse duhen ato amendamente? Çfarë ju rëndonte ju një caktim date, një shprehje vullneti nga Partia Demokratike për hapjen e negociatave?
Basha: Kush tha që na rëndonte?
Një vizë e hequr atje do të thotë që ju rëndon.
Basha: Ju ftoj që ta shikoni me sytë e objektivitetit qytetar dhe jo me sytë e Taulant Ballës. Ne s’kemi kërkuar asgjë më shumë dhe asgjë më pak sesa ç ‘kërkon Bashkimi Europian: plotësimin e pesë kritereve; zgjedhje të lira dhe të ndershme, dekriminalizimin dhe luftë kundër drogës. Këto janë qëndrime të njohura të Bashkimit Europian, këto janë qëndrime të njohura të opozitës, përfaqësojnë interesin publik të qytetarëve . Gjithçka tjetër është manovër për t’i hedhur hi syve qytetarëve dhe për të hequr vëmendjen nga dështimi i Edi Ramës ne drejtim të pesë prioriteteve, dhe në veçanti sa i përket dekriminalizimit, luftës kundër drogës dhe zgjedhjeve të lira dhe të ndershme.
