Pas hapjes së procesit të votimit për Kryetar të LSI-së, Zv.Kryetari i Lëvizjes Socialiste për Integrim, z. Petrit Vasili, votoi në Njësinë 5.
Teksa shprehu vullnetin e tij me votë për kandidatin për kryetar dhe për delegatët që do të përfaqësojnë strukturat e LSI-së në Konventën Kombëtare Zgjedhore që do të mbahen në muajin dhjetor, Vasili vlerësoi standardin e vendosur nga LSI-ja në politikën shqiptare.
“Procesi i votimit po ecën në mënyrë të shkëlqyer në gjithë territorin e vendit. Jam shumë i lumtur që sapo përfundova procesin e votimit. Jam sigurisht shumë i lumtur gjithashtu që dhe mbas 12 vjetësh të themelimit të LSI-së, standardi i vendosur për herë të parë në atë kohë në politikën shqiptare për të zgjedhur me principin një anëtar një votë kryetarin e LSI-së, vazhdon të jetë një princip i pandryshuar dhe shumë i shëndetshëm brenda LSI-së”, – tha z. Vasili, teksa i bëri një apel të gjithë anëtarëve të LSI-së që t’u drejtohen qendrave të votimit të hapura në të gjithë vendin.
“Sigurisht që është një moment për të bërë thirrje dhe për të ftuar të gjithë anëtarët e LSI-së që të vazhdojnë me intensitet të lartë, sikurse ka filluar që në mëngjes, ku masivisht po u drejtohen qendrave të votimit jo vetëm për të zgjedhur kryetarin e ri të LSI-së, jo vetëm për të rinovuar forumet e saj, por për të shprehur atë mendim shumë të gjallë politik dhe intensiv që u shpreh gjatë gjithë fushatës, dhe që besoj i ka bërë shumë mirë, jo vetëm LSI-së, por edhe shoqërisë shqiptare, qoftë në drejtim të hapjes së saj, qoftë në drejtim edhe të krijimit të hapësirave pa asnjë kufizim të mendimit të lirë, të mendimit intelektual dhe atij akademik”, – theksoi Zv.Kryetari i LSI-së.
Gjithashtu, z. Vasili u shpreh se sot është një ditë e mirë, një ditë e veçantë për LSI-në, ndërsa përshëndeti vendimin e kryesisë që në këto zgjedhje të konkurrohet me lista të ndara ku kuotat e respektimit për LRI-në, për LGI-në dhe LSI-në janë saktësisht nga 1/3 e secilit duke krijuar një baraspeshë të gjithë faktorëve.
“Sigurisht, Shqipëria mund të bëhet më e mirë vetëm e vetëm në qoftë se ky mendim thuhet lirshëm dhe gjen jehonën e tij brenda partive politike që janë shprehje e vullnetit politik të popullit. Megjithatë, sot është një ditë e mirë, një ditë e veçantë për LSI-në, ashtu siç kanë qenë të veçanta gjithmonë edhe zgjedhjet dhe mënyra se si ajo ka vepruar. Besoj që misionin e ditës po e jep e gjithë anëtarësia e saj. Unë do të përshëndesja dhe vendimin e kryesisë që në këto zgjedhje, ne kemi konkurruar me lista të ndara ku kuotat e respektimit për LRI-në, për LGI-në dhe LSI-në janë saktësisht nga 1/3 e secilit duke krijuar një baraspeshë të gjithë faktorëve, qoftë atij gjinor, qoftë atij rinor. Kështu që ju urojë sukseset më të mira LSI-së në këtë proces të shkëlqyer që ajo ka filluar sot dhe që po të tillë do ta përfundojë falë edhe pjesëmarrjes të anëtarësisë e cila ftohet t’i përdori dhe orët në vazhdim për të shprehur vullnetin e saj”, – deklaroi në prononcimin e tij Zv.Kryetari i LSI-së, z. Petrit Vasili.
