Finalizohet me sukses një tjetër operacion antikanabis, në të cilin u angazhuan Drejtoria Vendore e Policisë Gjirokastër dhe SHÇBA dhe Komisariatin e Policisë Përmet.
Operacioni u zhvillua në pyllin e fshatit Kreshovë, të Njësisë Administrative Petran.
Blutë kanë zbuluar dy kapanonë të vegjël që shërbenin për tharje të bimëve narkotike.
Në kapanone u sekuestruan 95 kg kanabis si dhe u asgjesuan 1100 bimë narkotike në proces tharje.
“Gjatë operacionit u evidentuan dy kapanonë të vegjël të mbuluar me plasmas, ku brenda tyre u gjetën të varura për t’u tharë 1100 bimë narkotike.Gjithashtu u gjetën dhe u sekuestruan dhe 11 thasë të mbushur me boçe të bimëve narkotike me peshë 95 kg Cannabis Sativa.Bimët u asgjesuan në vend me anë të djegies” sqaron policia.
Sakaq blutë kanë identifikuar dhe po punojnë për kapjen e dy personave të dyshuar si pronarë të lëndës narkotike. Policia thotë se janë banorë të zonës.
