Zlatan Ibrahimovic mund të ishte dërguar jashtë, me karton të kuq, disa minuta pasi kishte filluar ndeshja e Manchester United kundër Fenerbahçes, në “Europa League”.
Në mungesë të suksesit, Zlatan Ibrahimovic u shfaq shumë nervoz në fushën e stadiumit të Fenerbahçes, të enjten. Sulmuesi i Manchester United hyri në minutën e 30-të në vend të Paul Pogba, i cili u dëmtua, por mund të ishte përjashtuar nga ndeshja dhjetë minuta më vonë. Suedezi, i mërzitur, mori në duar fytyrën e Kjaer.
Ai u paralajmërua nga arbitri Mazic, por suedezi nuk hezitoi të shtynte edhe krahun e zyrtarit me shpërfillje. Në këtë mënyrë, Zlatan Ibrahimovic mund të pezullohet nga UEFA, pas këtij veprimi në humbjen 2-1 të Manchester United në Turqi.
Skuadra e Jose Mourinho tani ndodhet në vendin e tretë të Grupit A, një pikë prapa Fenerbahce dhe dy pikë pas Feyenoord, me vetëm dy lojëra, që kanë mbetur për t’u luajtur.
