Ministria e Arsimit ka sqaruar vendimin e Ministrisë për heqjen e simboleve turke në shkollat turke në Shqipëri, duke pranuar se ato janë hequr me kërkesë të Ankarasë.
Sekretari i Përgjithshëm i MAS, Plarent Ndreca, thotë se shkresa është firmosur pas shqetësimit të ngritur nga Ambasada turke në Tiranë.
“Ambasada ka kërkuar që këto simbole te mos vendosen pa miratimin e Ambasadës. Në shtetin shqiptar këto janë shkolla shqiptare edhe është e drejt e shtetit që të kërkojë mospërdorimin e simboleve të tyre”.
Ndreca tha se këto institucione arsimore janë të akredituara dhe licensuara sipas ligjit.
Ai është shprehur se nuk kanë informacion për mospërputhje të financimit privat.
Shkresa e firmosur nga MAS
“Në Ministrinë e Arsimit dhe Sportit është paraqitur shkresa me nr. 11395 prot. datë 29.09.2016 e Ministrisë së Punëve të Jashtme lidhur me kërkesën e ambasadës turke në Tiranë për të ndaluar përdorimin e emërtimeve “turke” dhe simboleve kombëtare të Republikës së Turqisë, përfshirë flamurin turk, në godinat e institucioneve arsimore jopublike.
Bazuar në nenin 34 të ligjit 80/2015 “Për arsimin e lartë dhe kërkimin shkencor në Republikën e Shqipërisë”, institucionet e arsimit të lartë kanë emrin zyrtar dhe stemën, të cilat përcaktohen në vendimin e hapjes së institucionit.
Për sa më sipër kërkojmë respektimin e dispozitës së mësipërme ligjore, për përdorimin e emërtimeve zyrtarë të stemës, që u janë miratuar në aktin e hpjes së institucionit”.
