Për vitin 2017, qeveria parashikon të shpenzojë më shumë para, sidomos në investimet kapitale që do të rriten 120 milionë dollarë. Ajo do investojë 710 mln $.
Paratë do të sigurohen nga miradministrimi i të ardhurave nga Tatimet dhe Doganat, ku parashikohet që vitin tjetër të jenë 200 milionë dollarë më shumë. Të dhënat paraqiten në draftin paraprak të buxhetit të vitit të ardhshëm. “Panorama” zbardh të plotë draftin e buxhetit të hartuar nga Ministria e Financave. Buxheti i 2017¬s do të jetë më i madh se buxheti aktual, shpenzimet do të jenë më të larta, mbledhja e të ardhurave fiskale parashikohet më e lartë. Për herë të parë përfshihen në buxhet fondet për rritje pagash dhe pensionesh.
TË ARDHURAT E SHPENZIMET
Të ardhurat e buxhetit janë parashikuar 436,4 miliardë lekë, dukshëm shumë herë më të larta se buxheti i 2016¬s. Mbledhja e të ardhurave parashikohet të jetë rreth 22 miliardë lekë më tepër se 2016¬ta, apo 220 milionë dollarë.
Të ardhurat nga Tatimet dhe Doganat do të jenë 299,4 miliardë lekë, nga 282,2 miliardë lekë që janë këtë vit. Pritshmëritë e buxhetit janë që administrata tatimore dhe doganore të arkëtojë 17,2 miliardë lekë më shumë. Rritje do të kenë arkëtimet nga TVSH-ja me rreth 28 milionë dollarë, tatimi mbi fitimin 43 milionë dollarë dhe rritja nga akcizat do të jetë 15 milionë dollarë.
Shpenzimet në 2017-n priten të jenë 469,5 miliardë lekë, nga 449,5 miliardë lekë që ishin parashikuar këtë vit apo 20 miliardë lekë më shumë.
INVESTIMET
Edhe fondi që do të shpenzohet për investime do të jetë me rritje. Për vitin e ardhshëm, që përkon edhe me zgjedhjet parlamentare, qeveria ka rritur investimet publike 120 milionë dollarë. Sipas buxhetit, fondet për investime do të jenë 71,6 miliardë lekë, apo rreth 710 milionë dollarë, ndërsa për këtë vit, fondi i investimeve ishte 59,2 miliardë lekë apo 590 milionë dollarë. Rritja më e lartë e investimeve do të jenë me financim të huaj krahasuar me 2016-n. Parashikohet me ulje financimi nga buxheti për sektorin e energjisë, kjo për shkak të performancës pozitive në arkëtimin e të ardhurave në këtë sektor. Për 2017¬n, huadhënia për energjinë do të jetë 1,5 miliardë lekë, nga 4,7 miliardë lekë që është aktualisht, pra parashikohet të jetë 3,2 miliardë lekë më pak.
DEFICITI
Qeveria do të ulë edhe deficitin, edhe pse në vitin e ardhshëm parashikohet rritja e shpenzimeve. Deficiti për vitin 2017 parashikohet të jetë 33 miliardë lekë, nga 35 miliardë lekë që është aktualisht. Sipas të dhënave, deficiti parashikohet të ulet rreth 1,9 miliardë lekë. Shkak i kësaj situate është që qeveria nuk po merr më borxh, ndërsa janë shlyer të gjitha detyrimet e prapambetura
