Lëvizja Socialiste për Integrim nuk ndalet në delirin e saj se do të dalë forca e parë politike në vend në zgjedhjet e ardhshme parlamentare.
Ndoshta ngaqë Përparim Spahiu dhe Shezai Rrokaj nuk kanë se çfarë ofertë t’iu bëjnë anëtarëve të LSI-së në garën shou për kreun e partisë ku kandidojnë kundër Ilir Metës, kanë vendosur të delirojnë duke thënë herë pas here që LSI-ja do të jetë forcë e parë politike.
“LSI-ja sot mund të mendojë, mund të besojë dhe mund të punojë në qoftë se ne do të kemi solidaritet me njëri-tjetrin, vullnet me njëri-tjetrin për të qenë forcë e parë politike. Dikush ka qeshur. Unë nuk qesh me mendimet e mia sepse besoj në mendimet që them. Kjo nuk do të thotë se ne nuk mund të bëjmë aleanca. Por ne nuk duhet ta mbajmë më parë mendjen se me kë do të duhet të bëjmë aleancë, nuk mund ta mbajmë mendjen se me kë duhet të bëjmë aleancë, se sa mendjen që ne të fitojmë për të qenë forcë e parë”, tha kandidati Rrokaj në Sarandë.
Më tej, Shezai Rrokaj u shpreh se LSI është luajale në aleancat e saj të cilat i bën për interesat e mëdha të vendit.
