Një koncert kundër ndërtimit të Hece-ve në Valbonë, por dhe kundër ligjit që u miratua për importin e plehrave në Shqipëri. Një koncert për protestë progresive, pa bordura politike, pa logo, pa emra institucional, vetëm për shqetësimin dhe kurajon qytetare civile. Kjo është nisma e dy këngëtareve Elina Duni dhe Eda Zari, të cilës i janë bashkuar edhe shumë artistë të tjerë, për t’u finalizuar me dy koncerte, datë 29 tetor në Valbonë dhe 30 tetor në Tiranë.
Dëshira e tyre është që kësaj nisme t’i bashkohen individ, që duan të jetojnë dhe të rrisin fëmijët e tyre në Shqipëri, me tokë, ujë, ajër dhe jetë të pastër, pa plehra, pa ndotje.
Elina, ndonëse, jetoni dhe punoni jashtë vendit, disa nga lëvizjet e fundit politike, si aprovimi i ligjit të importit të plehrave dhe ndërtimi i Hece-ve në Valbonë, ju kanë prekur edhe juve. Por, çfarë ju bën që ky rikthim i juaj të jetë ndryshe nga herët e tjera, kësaj here me artin tuaj kërkoni që të “kundërshtoni” vendime politike…
Për të mbështetur Valbonën, por edhe për të protestuar kundër ligjit që u miratua për mbetjet në Shqipëri. Unë në çdo koncert nëpër botë këndoj përherë këngët shqiptare dhe pas koncerteve ka dhe njerëz, të cilët më pyesin se si mundet që të vijnë në Shqipëri. Unë duke ndjekur zhvillimet në Shqipëri, nuk e di se çfarë mundet t’u them këtyre njerëzve: “Shkoni në Shqipëri, në Valbonë, sepse është një Park Kombëtar ku do të bëhen hidrocentrale apo shkoni në Shqipëri se po shkojnë dhe plehrat e botës”. Pra ndërgjegjja ime ka reaguar pas kësaj situate. Më pas kemi rënë dakord, me këngëtaren Eda Zarin, për këtë shqetësim qytetar që meqenëse ne kemi mundësi, kemi një zë, mundet që ta ngremë zërin tonë për këto çështje ambientaliste. Nuk po bëjmë politikë, por po bëjmë një protestë, protestë qytetare, një protestë me art
U keni bërë thirrje edhe artistëve të tjerë…
Ne u kemi bërë thirrje disa artistëve (brenda dhe jashtë vendit). Nuk janë përgjigjur të gjithë, por ne i kuptojmë gjërat që mund të ndodhin dhe ngërçet që ekzistojnë. Fatkeqësisht, duhet të mësojmë që t’i ndajmë gjërat se, në demokraci çdo qytetar ka të drejtë të shqetësohet për të mirën e përbashkët. Kjo gjë po ndodh! E mira e një lloj elite ekonomike, po vihet para të mirës së çdo qytetari të Shqipërisë.
A e keni mbështetjen e prindërve tuaj?
Besoj që edhe mbështetjen e prindërve e kam.
Ju kanë kontaktuar për ta ndaluar këtë nismë?
Në këtë nismë nuk ka asnjë bordurë politike. Nuk kam pasur asnjë lloj presioni nga qeveria për t’u tërhequr Sipas jush, çfarë pasojash negative mendoni se ka zbatimi i ligjit të importit të plehrave?
Pasojat do të jenë katastrofike, sepse nëse do fillojmë të merremi me plehrat e botës pa u marrë me plehrat e Shqipërisë. Unë ngado që shkoj prej vitesh në Shqipëri më dhemb shpirti, kur shoh se ngado ka plehra. Është shumë e thjeshtë, që sot me një ligj të ndalohen gjërat plastike, prandaj frika ime është që të riciklojmë njëherë plehrat tona.
Dhe së fundmi, çfarë reagimi prisni pas kësaj proteste progresive, ku vendin kryesor e zë arti juaj dhe zëri qytetar. Kush do donit të reagonte?
Shpresoj, shpresoj që ky koncert do t’i japë një frymë kësaj nisme qytetare. Muzika është një mjet shumë i rëndësishëm, që nga vitet 1960-‘70 në Amerikë, por ka shërbyer dhe kundër luftës në Vietnam. Është një mjet që përmban shumë idealizëm dhe dua që të luftojmë për këtë idealizëm, për këto nisma, për natyrën e Shqipërisë.
Shekulli
