“Britania e madhe duhet të jetë e hapur ndaj çdo opsioni sa i përket fenomenit Brexit, duke përfshirë pse jo edhe një referendum të dytë”, kështu u shpreh ish kryeministri britanik laburisti Tony Blair.
Sipas tij vota në favor të daljes së Britanisë nga Unioni është një katastrofë dhe duhet të analizohen ndikimet në jetën e vërtetë.
Blair ka kërkuar një studim për pasojat e daljes në jetën e përditshme. Edhe pse ai e ka pranuar verdiktin e referendumit të qershorit, ish-Kryeministri britanik, ka argumentuar se është e rëndësishme që pikëpamjet e 16 milionë britanikëve që mbështetën qëndrimin në BE të mos injorohen.
Ai shtoi se “nëse bëhet e qartë se është një marrëveshje që nuk ja vlen të largohemi nga BE-ja, ose në mënyrë alternative është një marrëveshje që do të jetë aq e rëndë për nga pasojat ndaj njerëzve, qytetarët mund të vendosin se nuk e duan atë drejtim, ose duhet të gjendet një mënyrë qoftë përmes Parlamentit, ose zgjedhjeve, ose mundësisht edhe një referendum i dytë ku njerëzit të shprehin pikëpamjet e tyre”.
Ish-kryeministri britanik, Tony Blair ka lëshuar një kushtrim ndaj atyre që votuan pro qëndrimit në referendumin e qershorit duke u thënë atyre se “ne jemi tanimë kryengritësit”.