Një kasolle e improvizuar është zbuluar në Dajt ku ishin vendosur 507 degë bimësh të dyshuara si kanabis sattiva si dhe në krah të saj është gjendur një parcelë me plot 502 bimë narkotike të mbjella.
Mëngjesin e sotëm në pyllin e Dajtit gjatë një aksioni antikanabis si dhe pas marrjes së sinjaleve, Specialistët e Komisariatit të Policisë Nr.4, në bashkëpunim me Shërbimin për çështjet e brendshme dhe Ankesa, kanë bërë të mundur asgjësimin e bimës narkotike.
“Në pyllin e Dajtit, është gjetur e mbjellë një parcelë me bimë narkotike, në të cilën kishte të mbjella 502 bimë të dyshuara narkotike dhe në krahë të kësaj parcele është gjetur dhe një kasolle e improvizuar në të cilën ishin të vendosura 507 degë bimësh të dyshuara narkotike të llojit Cannabis Sattiva në proces tharje. Bimët e gjetura u asgjësuan me anë të djegies”, thuhet në njoftimin e policisë.
Ndërkaq, policia po punon për identifikimin dhe kapjen e autorëve të kësaj vepre kriminale.
Gjithashtu ka filluar procedimi penal për veprën penale të “Shpërdorimit të detyrës”, parashikuar nga Neni 248 i Kodit Penal dhe po punohet për gjetjen e shtetasit G. H., 61 vjeç, banues në Tiranë, pasi ky shtetas është roje i Shërbimit Pyjor në Dajt.
