Kryetari i Partisë Demokratike Lulzim Basha akuzoi sot kryeministrin Edi Rama se e ka kthyer Shqipërinë në një narko-Republikë për drogën që ka pushtuar vendin.
Në përfundim të mbledhjes së Grupit Parlamentar të PD, Basha tha se selia blu me shoqërinë civile dhe me qytetarët do të vendosin se çfarë aksioni të përbashkët do të ndërmarrin për t’u përballur me këtë të keqe.
Basha theksoi më tek se po shihet përkeqësimi i gjendjes ekonomike, shëndetësisë etj.
“Ndërkohë që shohim ryshfetet për klientët e Edi Ramës, shohim shtimin e vlerës së Check Up për Vilma Nushin, problemin e madh të maturantëve që nuk mund të fshihet pas demagogjisë dhe propagandës, që ka lënë mijëra nga ata jashtë shkollës pa mundur të kapin degët që dëshirojnë, për shkak të paaftësisë dhe zinxhirit burokratik të kësaj qeverie.
Por tema kryesore ka qënë shpërthimi i drogës dhe gjithkush e ka të qartë se Edi Rama është bërë njësh me kartelin e drogës; pa u mbyllur tetori, Italia raporton se ka kapur 7 ton drogë; Greqia se ka kapur 5 ton drogë; vetë këtu në Shqipëri janë kapur 15 ton drogë në operacione që janë drejtuar kryesisht nga prokuroria.
Pra, ne po diskutojmë të gjithë skenarët e mundshëm, por ne do të përdorim të gjithë hapësirën institucionale për të denoncuar gjithçka derisa ta vendosim me qytetarët për t’u përballur me narkotrafikantët”, tha Basha.
