Përderisa në Kosovë statistikat tregojnë se 22 për qind e popullatës jeton në varfëri, një pjesë e shoqërisë, sidomos zyrtarë të lartë të institucioneve publike, figurojnë si milionerë.
Edhe pse pagat vjetore të zyrtarëve të lartë shtetëror sillen deri në mbi 13 mijë euro në vit, disa nga prej tyre figurojnë në formularët e Agjencisë Kosovare Kundër Korrupsionit si deklarues të pasurive prej qindra mijëra eurosh, apo edhe si milionerë.
Përfaqësues të shoqërisë civile ngrenë dyshime nëse pasuritë e shumë prej zyrtarëve apo profileve të larta të politikës janë fituar me anë të pagave, çka, sipas tyre, ngrisin dilema për pasurime të paligjshme.
Artan Demhasaj, nga Organizata për Demokraci, Anti-Korrupsion dhe Dinjitet “Çohu”, duke i konsideruar të dyshimta pasuritë e zyrtarëve politik, shprehet se edhe në rast se këta zyrtarë nuk kanë shpenzuar asnjë pagë, ata nuk do të mund ta arrinin pasurinë që e posedojnë.
“Ne kemi bërë një kontrollim të pasurisë së disa zyrtarëve, sepse është e pamundur të kontrollohen të gjithë zyrtarët. I kemi përzgjedhur 80 zyrtarë që kanë pozita më të larta, te të gjitha partitë politike dhe këtu mund të them se deri në 20 për qind e tyre kanë pasuri milionëshe”, shprehet Demhasaj.
Por, Jeton Zulfaj, menaxher i programit në Lëvizjen “Fol”, ka thënë për Radion Evropa e Lirë se të jesh milioner është normale. Por, sipas tij, shqetësuese mbetet mënyra e pashpjegueshme e fitimit të pasurisë.
Pikërisht këto shqetësime,thekson ai ,ka ngritur edhe faktori ndërkombëtar.
“Shqetësues paraqitet fakti se Komisioni Evropian, vitin e kaluar në Raportin e Progresit, jep sinjal të qartë se zyrtarët publik, përfshirë këtu një numër të madh prej tyre, performojnë pasuri të pashpjegueshme. Dhe Kosova nuk ka mekanizma për hetimin e kësaj pasurie”, ka thënë Zulfaj.
Tutje, Zulfaj thotë se tek zyrtarët publik është një shpërputhje e madhe në mes të pagës që marrin në pozitat e tyre dhe pasurisë që paraqesin.
“Disa zyrtarë, të cilët ne vazhdimisht i shohim, performojnë një luks të lartë të jetesës, duke përfshirë pushime të shtrenjta jashtë vendit, garderobë, makina, shtëpi luksoze, të cilat nuk janë konform me punën që ata e bëjnë në institucionet publike”.
“Kjo paraqet shqetësim – jo vetëm për Komisionin Evropian – por edhe për ne si qytetarë, njëkohësisht si organizatë të cilët e monitorojmë punën e tyre”, thekson Zulfaj.
Në anën tjetër, nga keqpërdorimi i pozitës zyrtare, po nga elita politike, ka bërë që politika dhe biznesi të jenë të ndërlidhura mes veti, thotë Artan Demhasaj. Kjo, sipas tij, ka bërë që – përmes tenderëve publik – kompani të ndryshme në Kosovë të fitojnë shuma milionëshe, duke çrregulluar tregun e lirë në Kosovë.
“Lidhja në mes politikës dhe biznesit në Kosovë është vështirë të dallohet për shkak të përzierjes në mes vete. Përmes politikës kanë arritur të marrin tenderë të ndryshëm dhe të rrisin të hyrat e tyre. Ose, disa politikanë që kanë qenë në pozita të caktuara dhe kanë pasur mundësi të japin tenderë, këta tenderë ua kanë ndarë kompanive të tyre”, ka thënë Demhasaj.
Në Kosovë ekziston Agjencia Kosovare Kundër Korrupsionit, në të cilën zyrtarët e lartë e kanë obligim të deklarojnë pasurinë e tyre. Por, kjo agjenci nuk ka numëruar sa zyrtarë kanë pasuri milionëshe.
Përveç deklarimit të pagës në mënyrë reale, pasuria e patundshme dhe ajo e luajtshme besohet se paraqitet sipas dëshirës së tyre, ngase askush nuk e verifikon atë. (REL)
