I vënë në qendër të sulmeve nga të rinjtë për favorizim të universiteteve private, kryeministri Edi Rama, në një takim me pedagogët e Universitetit të Tiranës ka folur gjatë gjithë fjalës së tij ka folur me një mimikë dhe ton të nervozuar.
Ai ka përsëritur sërish se qeveria e tij ndryshoi tërësisht sistemin arsimor në vend, që sipas tij ishte rrënuar vetëm e vetëm për qëllime përfitimi.
“Një rrënim tërësor i ishte bërë jo vetëm sistemit të arsimit në këto vite, por dhe kuptimit të tij dhe vlerës së tij. Kishim thyer një rekord botëror pasi kishim 18 herë më shumë universitete se Britania e Madhe dhe 15 herë më shumë se Gjermania për frymë. Ishte një sistem me një korsi, nga klasa e parë drejt e në universitet. Ndërkohë, korsia tjetër, që është kyçe për zhvillimin ekonomik e social të vendit, arsimi profesional, ishte mbyllur”, ka deklaruar Rama.
Kreu i qeverisë ka theksuar se, rrënuese ishte edhe skema e financimit, e cila sipas tij nuk merrte në konsideratë asnjë referencë, por thjesht toleronte universitetet private që të ktheheshin në një ndërmarrje fitimprurëse.
“Kështu u shkatërrua arsimi publik dhe ai privat. U shkatërrua edhe matura shtetërore”, ka thënë Rama, duke shtuar se qeveria e tij tashmë e ka futur sistemin në shinat e ndryshimit, ndërkohë që ekspertët thonë që sistemi është më kaotik se kurrë.
