Autori i krimit në familjen Lila në Ndroq, Kasëmi i ishte nënshtruar një operacioni në kokë disa kohë më parë dhe pas kësaj vuante nga depresioni. Rreth orës 19:30 ai vrau me çifte gruan e tij si dhe plagosi kunatën brenda banesës së tij.
Mësohet se ka qenë një periudhë e vështirë për bashkëshortët Lila në Ndroq, të cilët kanë pasur sherre të vazhdueshme thonë banorët e zonës. Tre javë më parë i kishin ndërprerë edhe kempin. Shkak për ngjarjen tragjike pasditen e së shtunës dyshohet të ketë qenë një konflikt mes autorit Kasëm Lila dhe gruas së tij Afize. Pas sherrit ai ka marrë armën e zjarrit, çifte, dhe ka qëlluar në drejtim të gruas së tij, por kunata ka ndërhyrë për të ndarë çiftin dhe ka mbetur plagosur.
Ngjarja ka ndodhur në fshatin Çoçaj, në Ndroq.
Dy gratë, Zyra Lila, 50 vjeç, dhe Afize Lila, 47 vjeç, janë dërguar në gjendje të rëndë në spitalin e Traumës, por kjo e fundit nuk mundi t’i mbijetonte plagëve të marra.
Sakaq, drejt Ndroqit janë nisur forcat e policisë të cilat kanë bërë të mundur arrestimin në banesë të autorit të krimit, Kasëm Lila, si dhe kanë sekuestruar çiften me të cilën ai qëlloi ndaj dy grave.
