Lëvizja për Universitetin ka zbuluar një skandal të rëndë të Ministrisë së Arsimit dhe Sportit. Zyrtarët e MASH me anë të një skemë kuotash fiktive po i çon studentët qëllimisht drejt universiteteve private.
Lëvizja për Universitetin shkruan në Facebook se “Ministria e Arsimit dhe Sportit ka ndërtuar një skemë regjistrimi që u mundëson studentëve të ndjekin online se kur shpallen fitues në një degë të caktuar dhe sa larg janë prej degëve të tjera të preferuara. Kur lista e fituesve bie derisa prek emrin e tyre, sistemi ia nxjerr atë degë me ngjyrë të gjelbër duke i dhënë mundësi maksimumi 48 orë për t’u regjistruar. Nga ana tjetër, në adresën https://klasifikimi.ualbania.rash.al/ ministria ka ndërtuar një tabelë elektronike ku në njërën kolonë janë kuotat që ajo u ka miratuar universiteteve degë pas dege dhe në tjetrën kuotat e lira, pra sa vende bosh kanë ngelur nga të regjistruarit deri në fazën që po flasim. Logjika e thjeshtë do që kuotat e lira të jenë të barabarta ose më të vogla se numri i përgjithshëm i kuotave në çdo degë”.
Po çfarë ndodh? Sipas Lëvizjes për Universitetin, në të të gjitha universitetet publike (hiq disa raste në Universitetin e Arteve) kuotat e lira janë më të pakta se kuotat e përgjithshme. Sakaq, pothuajse në të gjitha universitetet private, në shumë degë të tyre kuotat e lira rezultojnë më të mëdha se numri i kuotave të miratuara për ato degë. Spikat këtu Universiteti Evropian i Tiranës, i cili në çdo degë ka më shumë kuota të lira se kuota të miratuara nga ministria.
A mund të jetë lajthitje kompjuterike kjo?
“Të ishte kështu, rrëmuja e shifrave do t’i prekte njëlloj universitetet publike dhe private. Çfarë përfitojnë universitetet private nga shtimi fiktiv i kuotave në programin kompjuterik? Kthehemi në fillim, kur thamë se çdo studenti që rezulton fitues i del e gjelbër dega me të rënë viza e të regjistruarve. Kësisoj nëse universiteti privat X ka në degën Y 10 kuota të miratuara dhe 20 kuota të lira, njoftimi se u ka lindur e drejta për t’u regjistruar u shkon jo 10 ose më pak studentëve, por 20 të tillëve. Kësisoj ata rrisin fiktivisht numrin e të regjistruarve dhe ritmin e regjistrimit. Në të njëjtën degë universiteti publik Z ka 10 kuota të miratuara dhe vetëm 5 të lira. Kësisoj në 48-orëshin e fazës së regjistrimit mundësia u jepet vetëm 5 studentëve të renditur me rezultatet më të larta. A mund ta bëjnë vetë universitetet private këtë truk? Jo sepse sistemi kompjuterik kontrollohet nga një kompani e punësuar dhe e mbikëqyrur nga Ministria e Arsimit dhe Sportit”, shpjegon Lëvizja për Universitetin.
Ndërkohë që thekson se kupola drejtuese e ministrisë së Arsimit është përgjegjëse ligjërisht për gjithçka botohet në portal dhe për të gjitha efektet e tyre.
“Siç duket, pronarët e pangopur të universiteteve private dhe zyrtarët e Ministrisë së Arsimit dhe Sportit e kanë thelluar allishverishin e nisur prej vitesh me studentët. Nuk u mjaftuan me miratimin e një ligji arsimi që çon fonde shtetërore drejt universiteteve private dhe as me hartimin e një skeme aplikimi dhe regjistrimi që krijon panik te studentët duke i shtyrë drejt privatëve. Poshtërsia e fundit është krijimi i kuotave elektronike fiktive që të nxisin sa më shumë studentë të regjistrohen aty ku shkollimi kushton mijëra euro dhe cilësia është zakonisht si e një tezge të mykur me vitrinë të shkëlqyeshme”, shkruan Lëvizja për Universitetin që i bën thirrje Prokurorisë së Përgjithshme që “të nisë urgjentisht hetimin për këtë skemë mashtruese dhe të mos ngurojë të hetojë autoritetet më të larta qeveritare, madje edhe kryeministrin Rama, sponsorin politik kryesor të privilegjimit të privatëve”.
Në fund, Lëvizja për Universitetin iu bën thirrje studentëve të paregjistruar që të mos bien pre e panikut dhe presionit, por të mblidhen në rezistencë. “Drejtësia mund të vonojë një muaj, një vit apo dhjetë vjet, por ajo do të vihet një ditë. Asnjë keqbërës, qoftë politikan, nëpunës apo pronar universiteti, nuk do t’i shpëtojë dhënies së llogarisë deri në një për talljen me mundin dhe shkatërrimin e shpresës së mijëra e mijëra studentëve. Për Universitetin, Për Shoqërinë!”, përfundon deklarata e Lëvizjes për Universitetin.
