Nga Urim Gjata
“Por kanceri i vërtetë janë faqet ueb, të krijuara në vitet e fundit…”
Kjo shprehje monumentale kundër lirisë së shprehjes, nuk i përket diktatorit koreano-verior Kim Jong dhe aq më pak Fidel Kastros së Kubës. Janë fjalë të dala nga goja dhe zemra e italo-shqiptarit Karlo Bolino, i cili e mban veten si një pionier i medies së lirë, në Shqipërinë e post komuniste.
Ky mllef dhe kjo urrejtje për portalet dhe faqet ueb që kanë plotësuar vitet e fundit mozaikun bardh e zi, të një tufe mediesh të ashtuquajtura klasike dhe tradicionale të atrofizuara, të cilat nuk e fshehin më padronin e radhës është edhe thelbi i një shkrimi të gjatë në gazetën e tij, nënshkruar nga vetë Karlo Bolino.
Në pamje të parë ky shkrim triumfalist, duket sikur është bërë për të treguar sesi Bolino “duke fluturuar deri në SHBA” arriti të mbyllë një portal opozitar siç është Hashtag Albania dhe të kërcënojë duke futur në “listën e zezë” faqen e famshme në FB “Lolita”, e cila ironizon çdo ditë sukseset e Rilindjes dhe shërbëtorëve të saj mediatik.
Por në fakt thelbi i artikullit është krejtësisht tjetër; kërcënim i hapur për të gjitha mediet online që kritikojnë Edi Ramë&Co dhe tenderlëpirësit e tij.
Pas një fushate të paprecedentë të kryeministrit nëpër studio televizive, livadhe fshatrash me fermerë, auditorë studentësh, në faqen e tij në FB e Tëiter, e ku të mund kundër “medieve të kazanit”, lufta ndaj çdo zëri kundër ka kaluar në një fazë tjetër; mbyllje dhe kërcënime me gjyqe.
Karlo Bolino nuk e fsheh se është mik me kryeministrin, kryetarin e bashkisë dhe shumë ministra të tjerë. Reklamat shtetërore nga taksapaguesit shqiptar vërshojnë në mediet e tij, të cilat nuk mund të thuhet se janë ndër më të ndjekurat.
Por as Edi Rama dhe lukunia që i vjen pas për përpunimit të opinionit publik, nuk e fshehin fare që Bolino “çon ujë në mullirin” e tyre. Ky shkrim ku faqet ueb “të hapura vitet e fundit”, cilësohen si “kancer” duket sikur është gatuar në guzhinën e Edi Ramës dhe posaçërisht në komjuterin e Endri Fugës.
Aq shumë i entuziazmuar ka qenë për këtë editorial shefi i përpunimit të imazhit virtual që ka filluar ta besojë edhe vetë Rama, sa që nuk ka rezistuar dot, për të fshehur bashkë autorësinë në këtë fletërrufe kundër portaleve që kritikojnë Rilindjen. Vetëm pak minuta pas hedhjes së shkrimit te Shqiptarja.com, Fuga nxiton ta hedhë në faqen e tij në Tëiter.
Etiketimi “kancer” që u është bërë portaleve të hapura vitet e fundit është i rëndë, por mund të jetë edhe i vërtetë, përderisa thuhet me alarm nga propaganda e Rilindjes. Aq shumë i përmend Rama këto medie “kancer”, çdo ditë, sa herë të ketë rast dhe mundësi, sa që ato vërtet mund të jenë kthyer në një “kancer” për kancerin që ka kapluar Shqipërinë me këtë qeverisje të korruptuar që të vetmin shpëtim sheh ekonominë kriminale të kanabisit.
Kur vetë i sëmuri këmbëngul, mjekët dorëzohen, e lënë në hall të vet!
