Zbardhen të tjera detaje nga operacioni policor i një dite më parë ku në Krujë u gjetën sipas policisë 1.2 tonë kanabis.
Burimet e “News24” thanë se janë sekuestruar 1.3 ton kanabis i thatë dhe se deri më tani janë arrestuar 11 persona.
Gazetari Artan Hoxha ka deklaruar për “News24” se operacionin në Derven finalizuar me sekuestrimin e 1.3 tonëve hashash dhe arrestimin e 11 personave mund të çojë në baza të tjera magazinimi të lëndës narkotike. Sipas tij, kjo sasi hashashi do transportohej jashtë vendit.
“Janë të qarta tashmë përfundimet e operacionit, kemi të bëjmë me një bazë vendmagazinimi të lëndës narkotike, nga një grup kriminal. Këto janë sasi të mëdha që zakonisht transportohen jashtë territorit të vendit”- tha Hoxha.
Sipas tij, prokuroria po heton tashmë se si funksiononte grupi kriminal, në përbërje të të cilit përfshihen financuesit, organizatorët, punëtorët, edhe rojet e armatosur që garantonin sigurinë e zonës.
“Policia u përpoq të izolonte zonën, të mos lejonte persona të tjerë, apo edhe median, në ruajtje të sekretit hetimor pasi pretendon të shkojë në adresa të tjera ku dyshohet se mund të ketë baza të lëndës narkotike”—tha ai.
