Nuk ka qenë ndonjë mister i madh që Shtetet e Bashkuara gjithnjë fusin hundët në punët shqiptare. Por asnjëherë më parë nuk ka ndodhur që një personazh publik, që prej shumë e shumë vitesh e njohim si shqiptar të pastër si vetë ajri i maleve tona, si vetë ujët e kristaltë të burimeve të Kolonjës, të rezultojë një agjent i infiltruar prej kohe në rradhët tona.
Po, të dashur lexues. Gojët e Liga kanë mësuar se në të vërtetë, Eduard Zaloshnja është luftëtari Magua nga fisi luftarak i Huronëve.
Nga lëkurëkuq, vitet e gjata të qëndrimit në Shqipëri e kanë bërë lëkurëbardhë, por indiano-amerikani vendosi si kurrë më parë, të zbulojë infiltrimin e vet.
Magua alias Zaloshnja
Siç ka pohuar për rubrikën tonë kundërshtari i vjetër i Zaloshnjës, luftëtari Çingaçkuk nga fisi i Mohikanëve:
“Pasi luftrat indiane shkuan për lesh, shumë prej nesh u detyruam të hyjmë në shërbim të qeverisë federale. Kuptohet, Uashingtonit i hynin shumë në punë aftësitë e Zaloshnjës, më falni, Maguas, në përdorimin e shtizave, shigjetave dhe tomahoukut, por akoma më shumë mjeshtëria e tij e maskimit”.
Dhe në të vërtetë, Zaloshnjës i mjaftoi vetëm pak helm bretkose, pak ekstrakt nga myshku i mështeknës, një magji e vogël huronase me eshtra dreri dhe rritja e flokëve, që të shndërrohet në një shqiptar të vërtetë.
Besohet se pas angazhimit të shkurtër në politikën shqiptare të 1991-it (shihni foton mes indianëve të tjerë të infiltruar), Magua vendosi të rikthehet në zanatin e vjetër që bënte në SHBA, kur organizonte sondazhe mes fiseve Çeroki, Sjiu dhe Navaho.
Thotë Çingaçkuk: “Ju shqiptarët u çuditët me aftësitë sondazhiste të Maguas. Por mos harroni se ishin sondazhet e tij ato që na bënë lëmsh fiset indiane në Amerikë. U futëm në sherr derisa shfarosëm njëri-tjetrin. Është legjendë ajo sikur na vranë të bardhët. Jo mor vlla, Zaloshnja është fajtori!”
Gojët e Liga mësojnë se ekspozimi i fundit i Zaloshnjës me identitetin e tij të vërtetë, e ka një arsye:
Ndërsa sondazhet e tij nuk po trembin më asnjeri, Magua ka vendosur që këtë ta kompensojë me rikthimin te pamja e frikshme. Efektet e para kanë filluar të ndihen.
Gazeta DITA
