Ditët e fundit, pasi Erion Veliaj censuroi në Vizion + emisionin investigativ për vdekjen në Sharrë të Arditit 17 vjeçar, ra më shumë se kurrë në sy një fenomen. Pothuasje asnjë nga mediat e mëdha të vendit nuk është kritike ndaj kryebashkiakut. Të gjitha transmetojnë vetëm kronika të parapërgatitura nga redaksia okulte që është ngritur në zyrat e bashkisë së Tiranës. Të gjithë kanë urdhër të prerë nga pronarët: “Mos na ngacmoni Erionin”.
Pikërisht se donte të investigonte për vrasjen në Sharrë, u largua nga puna në A1, kryeredaktorja Alida Tota. Pikërisht për këtë, emisioni “Publicus” u zhduk nga ekrani.
Por interesante është të shikohet se pikërisht në të njëjtën kohë mediat e kapura nga pushteti, nuk kanë treguar të njëjtën peshë dhe të njëjtën masë ndaj një rilindasi tjetër: Ministrit të Brendëshëm Sajmir Tahiri. Ai është në targetin e kritikave për drogën, lidhjet me kriminelët, uniformat e policisë, përgjimet, sherret me prokurorinë, takimet me serialkillerat etj.
Pra pyetja që shtrohet është: Të dy rilindas, të dy të dyshuar për dhjetra afera dhe me qindra akuza mbi supe, pse për Veliajn gjithçka zhduket nga ekranet, kurse Sajmir Tahirit gjithçka i zmadhohet?
Këtu përgjigjja nuk mund të kërkohet vetëm tek karakteri prej servili që të zvarritet nga pas, i Erion Velisë. As tek arti i tij i të bërit të mardhënieve publike. Këtu kleçka duhet kërkuar tek ajo që ata kanë në dorë.
Dhe Veliaj ka më shumë natyrisht.
Ai sapo e bëri fytyrën e tij baltë duke parashikuar kulla të larta në planin e ri urbanistik të Tiranës, ndryshe nga sa kishte premtuar në fushatë: “zero ndërtime me mua kryetar bashkie”.
Dhe duke qenë se pronarët e mediave në Shqipëri, ende nuk kanë hapur as kompani eksporti kanabisi, as firmë për vrasje me pagesë, kuptohet se ata janë pengje të Erion Veliajt, si ndërtues në Tiranë.
Kjo është arsyeja sepse çdo kritikë për Veliajn zhduket nga ekrani dhe çdo akuzë ndaj Tahirit del e plotë.
E natyrisht këtu ka një problem të madh mediatik. Një problem të informimit të publikut dhe përçudnimit të demokracisë.
Por përpos tyre këtu ka një problem edhe brënda vetës PS. Sepse kështu mediat e pushtetit bëhen faktor jo vetëm në betejën politike kombëtare, por edhe në vendosjen e ekuilibreve të shtrembëra brenda selisë mavi. (Lapsi.al)
