Kombëtaret spanjolle e futbollit ka mbërritur sot në Rinas, nga ku ka vijuar rrugën drejt Shkodrës.
“La roja” mbërriti në Shqipëri rreth 60 minuta me vonesë për shkak të motit të keq, ndërsa lojtarët dhe stafi teknik nuk kanë pranuar që të japin asnjë prononcim për mediat. I vetmi që ka përshëndetur në aeroport ka qenë Diego Costa.
Ndërsa për t’u veçuar ka qenë edhe një episod me gazetarët spanjollë, të cilët ngatërruan daljen në aeroport, teksa fillimisht u futën te salla VIP dhe më pas përfunduan te kabinat e policisë.
Por me ndihmën e punonjësve të aeroportit kanë gjetur daljen e saktë dhe më pas kanë udhëtuar me ekipin e tyre kombëtar drejt Shkodrës, të shoqëruar nga RENEA.
Edhe kombëtarja shqiptare ka mbërritur po sonte në Rinas nga Lihtenshtejni. Dy ekipet do të ndeshen ditën e diel në orën 20:45 në Shkodër për eliminatoret e Rusi 2018.
