Deputeti i Partisë Demokratike, Astrit Patozi, deklaroi në Parlament se Shqipëria nuk mund të jetë një vend i lirë që ndërsa ndëshkohen gjyqtarët dhe prokurorët, nga ana tjetër rritet korrupsioni politik. Sipas tij, reforma në drejtësi nuk ka vlerë, nëse zgjedhjet blihen me para të pista.
“Ne kemi bindjen se ligjet që po shqyrtohen në këtë seancë e kapërcejnë Kushtetutën. Qeveria nuk e pranon, po për sa kohë që nuk ka një palë të tretë që të flasë i vetmi filter që ka mbetur pa u përdorur është Gjykata Kushtetuese. Nuk po merrem gjatë të shpjegoj konfliktin mes asaj që kemi votuar me 21 korrik dhe ligjeve të sotshme.
Nuk besoj se një vend bëhet më i lirë nëse rrit ndëshkimin e gjykatësve dhe prokurorëve dhe rrit korrupsionin në politikë.
Në rast se pas një muaji apo pas 10 muajsh qeveria do të nisë thasët e parave të pista në Shqipëri për të blerë zgjedhjet reforma në drejtësi nuk do të ketë asnjë vlerë.
Ky sistem si ndëshkim nuk ka burgun, por votën. Kush mendon se synimi i ligjit tonë për dekriminalizimin ishte jo pastrimi i parlamentit, por çmontimi i teknologjisë kriminale që lidh bandën me zgjedhjet. Në këtë optikë duhet parë edhe vërshimi i kanabisit kudo në Shqipëri”, u shpreh Patozi.
