Ish-kryeministri Sali Berisha i është përgjigjur sot shefit të qeverisë edhe për deklaratat e Ramës për qëndrimin e PD-së ndaj ambasadorit amerikan Donald Lu.
Sipas Berishës, kryeministri po merr përsipër të bëjë zëdhënësin e një ambasadori, njësoj si shoku Xhemal.
“Një kryeministër që merr përsipër të bëhet zëdhënës i një ambasadori do t’i them sot së bashku me ju qytetarë shoku Xhemal, njësoj si personazhi të skeçin e njohur. Këtë zotëri duhet ta quajmë sot kështu, shoku Xhemal, as kazan, as legen”, tha Berisha.
Duke deklaruar se kryeministri në çdo fjalë që thotë ka nga një gënjeshtër, Berisha akuzoi mazhorancën se po përpiqet të sabotojë reformën në drejtësi. Sipas Berishës, Strasburgu iu përgjigj vettingut të Ramës duke e shkelmuar atë përmes hedhjes poshtë të kandidatëve të propozuar nga kryeministri.
“Po talleni me Shqipërinë, po përpiqeni të sabotoni reformën. Strasburgu shkelmoi vetingun e Ramës. Ky është vettingu i tyre, të shohin reagimin e opozitës ndaj ligjit të vettingut, është vetëm nepotizëm, drogë lidhje me krimin. Ky është vetingu i Edi Ramës. Reforma do bëhet, asgjë nuk do ta pengojë të bëhet një e mirë e madhe për të gjithë shqiptarët. Sot e pengojnë sarajet e Burrelit, e ka blerë me 1 dollarë metri katrorë”, tha Berisha.
